مەسعود پزیشکیان سەرۆککۆماری ئێران و تەمیم بن حەمەد ئالسانی، میری قەتەر لە پەیوەندییەکی تەلەفۆنیدا دوایین هەوڵە دیپلۆماسییەکان و پێشهاتەکانی ناوچەکە و پەیوەندییە دوو قۆڵییەکانی نێوانیان تاوتوێ کرد.

ڕۆڵى قەتەڕ لە ڕێککەوتنەکاندا

میدیای ئێران بڵاویکردووەتەوە، لە پەیوەندییە تەلەفۆنییەکەدا سەرۆکی ئێران سوپاسی ڕۆڵی قەتەری لە هەنگاوە دیپلۆماسییەکان بۆ گەیشتن بە ڕێککەوتن کردووە و ڕایگەیاندووە، بە بێ هەوڵەکانی پاکستان و قەتەر و ژمارەیەک وڵاتی دیکە، ڕێگەکانی گەیشتن بە ڕێککەوتن لەگەڵ ئەمریکا ئەستەم دەبوو.

تاران پابەندى پەیوەندییەکانە لەگەڵ وڵاتانى موسوڵمان

پزیشکیان بە میری قەتەری گوتووە، تاران پابەندە بە پەیوەندی باشی سیاسی و ئابووری و فەرهەنگیی لەگەڵ وڵاتانی موسڵمان و ناوچەکە.

قەتەڕ: ڕێککەوتنەکە هەنگاوێکى گرنگە

هەر لە پەیوەندییە تەلەفۆنییەکەدا میری قەتەر واژۆکردنی یاداشتنامەکەی تاران و واشنتنى بە هەنگاوێکی گرنگ بۆ کۆتاییهاتنی جەنگ و بەرقەرارکردنی ئارامی و ئاسایش لە ناوچەکە ناوبردووە و ڕایگەیاندووە، دەوحە لە هەوڵەکانی بۆ بەهێزکردنی پەیوەندییەکانی لەگەڵ تاران بەردەوام دەبێت.