عێراق بەهۆی پێگە جوگرافییەکەیەوە خاوەنی تۆڕێکی فراوانی دەروازە سنوورییەکانە لەگەڵ وڵاتانی دراوسێ، کە بەشێکیان لەلایەن دەستەی فیدراڵییەوە سەرپەرشتی دەکرێن و بەشەکەی تریشیان لەژێر دەسەڵاتی حکومەتی هەرێمی کوردستاندان.

دابەشبوونی کارگێڕیی دەروازە سنوورییەکان

عێراق خاوەنی 32 دەروازەی سنووریی فەرمییە کە لە وشکانی و ئاوی پێکهاتوون. دەستەی دەروازە سنوورییەکانی عێراق سەرپەرشتیی 19 دەروازە دەکات کە 13یان وشکانی، 3 ئاسمانی و 3 بەندەری ئاوین. لەم ناوەندەدا، 6 دەروازەی سەرەکیی هەرێمی کوردستان لەلایەن حکومەتی فیدراڵییەوە دانیان پێدانراوە کە 4یان وشکانی و 2یان ئاسمانیی نێودەوڵەتین و لەلایەن حکومەتی هەرێمەوە بەڕێوەدەبرێن. هەروەها 4 دەروازەی نافەرمی لە سنوورەکانی هەرێم لەگەڵ ئێراندا بوونیان هەیە.

دەروازە ستراتیژییەکانی هەرێمی کوردستان

دەروازەی نێودەوڵەتیی ئیبراهیم خەلیل لە پارێزگای دهۆک، گرنگترین ناوەندی ئاڵوگۆڕی بازرگانییە لەگەڵ تورکیا. لەگەڵ ئێراندا، دەروازەی باشماخ لە پێنجوێن بۆ گەشتیاری و بازرگانی و دەروازەی پەروێزخان لە خانەقین وەک یەکێک لە گەورەترین ناوەندەکان بەکاردێن. هەروەها دەروازەی حاجی ئۆمەران لە هەولێر ڕۆڵێکی ستراتیژی دەگێڕێت، لە پاڵ دەروازەی سەیران بەن لە پێنجوێن و تەلەعەریش لە دهۆک کە هاوکارن لە جووڵەی بازرگانیدا.

دەروازەکانی ناوەڕاست و خوارووی عێراق

عێراق لە ناوەڕاست و باشوورەوە لە ڕێگەی چەند دەروازەیەکی سەرەکییەوە لەگەڵ ئێران بەستراوەتەوە، کە دیارترینیان دەروازەی زرباتیەیە لە واست. هەروەها دەروازەی شێب لە میسان، شەلەمچە لە بەسرە و دەروازەی مونزریە لە پارێزگای دیالە، دەمارە سەرەکییەکانی ئاڵوگۆڕی کاڵا و گەشتیاران پێکدەهێنن لەگەڵ کۆماری ئیسلامیی ئێران.

پەیوەندییە سنوورییەکان لەگەڵ وڵاتانی ڕۆژئاوا و باشوور

لەگەڵ سووریا، هەردوو دەروازەی وەلید و قائیم لە پارێزگای ئەنبار ئاڵوگۆڕەکان ڕێکدەخەن. دەروازەی تریبێل لە ئەنبار وەک تاکە دەروازەی فەرمی لەگەڵ ئوردن کار دەکات. سەبارەت بە سعودیە، دەروازەی عەرعەر لە پارێزگای ئەنبار تایبەت کراوە بە ئاڵۆگۆڕی بازرگانی و گەشتەکانی حەج و عومرە بۆ هاووڵاتییانی عێراق، کە ئەمەش گرنگییەکی ئایینی و ئابووریی بۆ وڵاتەکە هەیە.