شێرپەنجەی جگەر بە شەشەم باوترین جۆری شێرپەنجە دادەنرێت، ساڵانە نزیکەی 900 هەزار کەس تووشی شێرپەنجەی جگەر دەبن، شێرپەنجەی جگەر زیاتر لە وڵاتانی ڕۆژهەڵات و باشووری ئاسیا لەگەڵ باکوری ئەفریقا باوترە.

شێرپەنجەی جگەر چییە؟

شێرپەنجەی جگەر بریتییە لە گەشەی نائاسایی خانەکانی جگەر بەشێوەیەک لە کۆنترۆڵی جەستە دەردەچن و ژمارەیان بە شێوەیەکی بەرچاو زیاد دەکات، ئەمەش دەبێتەهۆی تێکچوونی فرمانی ئاسایی خانەکانی جگەر.

نیشانەکانی تووشبوون بە شێرپەنجەی جگەر چین؟

باوترین نیشانەکانی تووشبوون بە شێرپەنجەی جگەر بریتین لە:

1. دابەزینی کێشی جەستە بەبێ هۆکار
2. نەمانی ئارەزووی خواردن
3. بوونی ئازار لەبەشی سەرەوەی سک
4. ڕشانەوە
5. ماندووبوون
6. ئاوسانی سک
7. زەردبوونی ڕەنگی پێست
8. سپیبوونی ڕەنگی پیسایی

هۆکارەکانی تووشبوون بە شێرپەنجەی جگەر چین؟

تووشبوون بە شێرپەنجەی جگەر کۆمەڵێک هۆکاری هەیە، لەوانە:

1. تووشبوون بە هەوکردنی جگەری ڤایرۆسیی HBV, HCV
2. شەکرە
3. بەرکەوتن بە هەندێک پێکهاتەی ژەهراوی کە لەسەر بەرووبوومە هەڵگیراوەکان، وەک دانەوێڵە دروست دەبن
4. بوونی نەخۆشییەکانی دیکەی جگەر، وەک نەخۆشیی ویڵسن
5. خواردنەوە کحولییەکان
6. چەوریی جگەر