سەرۆکی پەرلەمانی ئێران وردەکاریی نوێی دانوستانەکانی سویسرا ئاشکرا دەکات و ڕایدەگەیەنێت، تاران و واشنتن لەسەر کۆتاییهێنان بە شەڕ لەگەڵ "بەرەی مقاوەمە" و ئازادکردنی 12 ملیار دۆلار گەیشتوونەتە ڕێککەوتن.

هەماهەنگیی ئێران و ئەمریکا بۆ دۆخی لوبنان

محەممەد باقر قالیباف، سەرۆکی پەرلەمانی ئێران و سەرۆکی شاندی دانوستانکار ڕایگەیاند، لە دانوستانەکانی سویسرادا ئێران و ئەمریکا گەیشتوونەتە ئەو ئەنجامەی کە دەبێت پێکەوە پاراستنی سەروەریی خاکی لوبنان مسۆگەر بکەن. ئاماژەی بەوەش کرد، بەهۆی دەستپێکردنی ئەم دانوستانانەوە، قەبارەی هێرشەکان کەمبووەتەوە و بۆ ماوەی 2 ڕۆژیش ئاگربەستی تەواو جێبەجێ کراوە.

ئازادکردنی 12 ملیار دۆلار و سزاکانی سەر نەوت

سەبارەت بە لایەنی دارایی ڕێککەوتنەکە، قالیباف ئاشکرای کرد کە دوو بڕە پارەی 6 ملیار دۆلاری (کۆى گشتى 12 ملیار دۆلار) ئازاد دەکرێن. ڕوونیشیکردەوە کە تاوەکو گەیشتن بە ڕێککەوتنی کۆتایی لەسەر پرسە بانکییەکان، گەمارۆکانی سەر نەوت و پترۆکیمیایی ئێران لادەدرێن، ئەگەرچی هێشتا ڕێککەوتنی کۆتایی واژۆ نەکراوە و هەندێک لە گەمارۆکان وەک خۆیان بەردەوامن.

کشانەوەی هێزەکانی ئیسرائیل و گەڕانەوەی ئاوارەکان

سەرۆکی شاندی دانوستانکاری ئێران گوتی، بڕیار دراوە ناوەندێک بۆ هەماهەنگی دابمەزرێت تاوەکو کێشەکان چارەسەر بکرێن و زەمینە خۆش بکرێت بۆ پاشەکشەی هێزەکانی ئیسرائیل لە خاکی لوبنان. ئامانجی ئەم ناوەندە ئەوەیە کە ئاوارە لوبنانییەکان بتوانن بە سەلامەتی بگەڕێنەوە سەر ماڵ و حاڵی خۆیان و سەروەریی خاکی وڵاتەکەیان بپارێزرێت.

دژایەتییەکانی ئیسرائیل و بەردەوامیی دانوستانەکان

قالیباف هۆشداری دا کە ئیسرائیل بە توندی دژی پڕۆسەی دانوستانەکانە، چونکە "لەناوچوونی خۆی لەم ڕێککەوتنەدا دەبینێت" و دەیەوێت بەربەست دروست بکات. جەختیشی کردەوە کە کۆبوونەوەی شاندەکانی ئێران و ئەمریکا بۆ بەدواداچوونی جێبەجێکردنی بەندەکان لە ماوەی ئەو 60 ڕۆژەی دیاریکراوە، بە شێوەیەکی بەردەوام ئەنجام دەدرێن.

کۆتاییهێنان بە شەڕ لەگەڵ بەرەی مقاوەمە

لە کۆتایی لێدوانەکەیدا بۆ میدیای وڵاتەکەی، قالیباف جەختی کردەوە کە لە ڕێککەوتننامەکەدا جەخت لە کۆتاییهێنان بە شەڕ لەگەڵ ئێران و "بەرەی مقاوەمە" کراوەتەوە. ئەم هەنگاوە وەک سەرەتایەک بۆ گەڕانەوەی سەقامگیری بۆ ناوچەکە و دەستپێکردنی پڕۆژە مەزنەکانی ئاوەدانکردنەوە لە ئێران سەیر دەکرێت.