بۆنی ناخۆشی ناودەم گرفتێکی تەندروستیی باوە لە ناو هاونیشتمانییان، دەکرێت بۆنی ناخۆشی ناودەم نیشانەی بوونی نەخۆشیی دیکە بێت، د. بانە هیدایەت، پزیشکی ڕاهێنراوی نەخۆشییەکانی دەم و ددان، هۆکار و چارەسەرەکانی بۆنی ناخۆشی ناودەم دەخاتەڕوو.

هۆکارەکانی بۆنی ناخۆشی ناودەم چین ؟

باوترین هۆکارەکانی بۆنی ناخۆشی ناودەم، بریتین لە:

1. کۆبوونەوەی بەکتریا : پاشماوەی خۆراک لە نێوان ددانەکان و لەسەر زمان دەبێتەهۆی گەشەکردنی بەکتریا و دروستبوونی بۆنی ناخۆشی ناودەم
2. وشکبوونی ناودەم : لیک دەم پاک دەکاتەوە، کاتێک دەم وشک دەبێتەوە، لە کاتی خەوتن یان بەهۆی کەمخواردنەوەی ئاو و جگەرەکێشان، دەبێتەهۆی دروستبوونی بۆنی ناخۆشی ناودەم
3. کێشەی پووک و ددان : ڕزیویی ددان (کلۆری ددان) و هەوکردنی پووک لە هۆکارە سەرەکییەکانی بۆنی ناخۆشی ناودەمن

 چارەسەری بۆنی ناخۆشی ناودەم چییە؟

باوترین چارەسەرەکانی بۆنی ناخۆشی ناودەم، بریتین لە:

1. پاککردنەوەی زمان : بەشێکی زۆری بەکتریای ناودەم لەسەر بەشی کۆتایی زمان دەنیشێت، بە بەکارهێنانی فڵچەی ددان بۆ سەر زمان دەتوانرێت ئەم گرفتە کەم بکرێتەوە
2. بەکارهێنانی پەتی ددان: چونکە فڵچەی ددان ناتوانێت نێوان ددانەکان پاک بکاتەوە، پاشماوەی خۆراکی نێوان ددانەکان ئەگەر لانەبرێن دەبنەهۆی دروستبوونی بۆنی ناخۆشی ناودەم
3. ئاو خواردنەوەی بەردەوام بۆ ئەوەی هەمیشە دەم بە شێداری بمێنێتەوە و لیک دەربکات کە دژە بەکتریایەکی سروشتییە
4. بەکارهێنانی غەرغەرەی دەم (بێ کحول) : غەغەرەی دەم یارمەتیی لەناوبردنی بەکتریاکان دەدات، بەڵام دەبێت بێ کحول بێت بۆ ئەوەی دەم وشک نەکاتەوە
5. بۆنخۆشکردنی دەم تەنیا بە بەکارهێنانی هەویری ددان نابێت