ڕاوێژکاری ئاسایشی نەتەوەیی عێراق و کاربەڕێکەرى باڵیۆزخانەى ئەمریکا لە عێراق کۆبوونەوە و تاوتوێی دۆخی هەرێمی و نێودەوڵەتی، دوایین پێشهاتەکانی ناوچەکەیان کردووە.

تاوتوێکردنی پەرۆشی سەرۆکوەزیرانی عێراق

قاسم عەبودی، ڕاوێژکاری ئاسایشی نەتەوەیی عێراق بە جۆشوا هاریس، کاربەڕێکەرى باڵیۆزخانەى ئەمریکا لە عێراقی ڕاگەیاندووە، سەرۆکوەزیرانی عێراق بەپەرۆشە بۆ کرانەوە و بونیادنانی پەیوەندییەکی باش و بەهێز لەگەڵ وڵاتانی دۆست و کۆمەڵگەی نێودەوڵەتی.

جەختکردنەوە لە هەڵوێستی نەگۆڕی عێراق

عەبودی جەختی لە هەڵوێستی نەگۆڕی عێراق کردووەتەوە، لە پرسە هەرێمی و نێودەوڵەتییەکاندا گوتوێتی، عێراق پشتیوانی ئاڕاستەیەکی ئاشتییانە دەکات کە سەقامگیری و خۆشگوزەرانی بۆ وڵاتان و گەلەکانیان پێبێت.

دووپاتکردنەوەی پشتیوانی ئەمریکا بۆ عێراق

لە بەرامبەردا جۆشوا هاریس، پشتیوانیی ئەمریکای بۆ حکومەتی عێراق دووپاتکردووەتەوە و پەرۆشیی وڵاتەکەشی نیشانداوە بۆ سەرخستنی ئەرکەکانی حکومەتی عێراق لە سەرجەم ئاستەکاندا.