دەستەی گشتیی گومرگی عێراق ڕایگەیاند کە یەکەم پرۆسەی گواستنەوەی بار بە سیستمی ترانزێت لە نێوان وڵاتانی ئوردن و ئیمارات لە ڕێگەی خاکی عێراقەوە بەسەرکەوتوویی جێبەجێ کراوە، ئەمەش وەک هەنگاوێک بۆ زیادکردنی داهاتی نانەوتی و کردنی وڵاتەکە بە پێگەیەکی لۆجستیی هەرێمی.

دەستپێکی چالاکییەکی نوێی بازرگانی

دەستەی گشتیی گومرگی عێراق ڕایگەیاند، یەکەم چالاکیی ترانزێت لە ڕێگەی خاکی عێراقەوە و لە نێوان وڵاتی ئوردن و ئیمارات لە دەروازەکانی ترێبیل و ئوم قەسر بەسەرکەوتوویی ئەنجام درا.

ڕێڕەوی گەشتەکە و گۆڕانکاری لە ڕێکارەکاندا

دەستەی گشتیی گومرگی عێراق لە ڕاگەیەندراوێکدا سەبارەت بە جێبەجێکردنی یەکەم چالاکیی گواستنەوەی بار بە ڕێگەی ترانزێت ئاشکرای کردووە، سەرکەوتنێکی جۆرییان بەدەست هێناوە، بەشێوەیەک بارەکە لە بەندەری عەقەبە لە ئوردنەوە لە ڕێگەی دەروازەی گومرگی لە ترێبیل هاتووەتە ناو خاکی عێراق، دواتر لە بەندەری ئوم قەسرەوە گەشتەکەی بەرەو ئاراستەی کۆتایی خۆی لە ئیمارات ئەنجام داوە و بەسەرکەوتوویی پرۆسەی ترانزێتەکە لە خاکی عێراق بەڕێوە چووە. دەستەکە ئاماژەی بەوەش کردووە، ئەمە بەرەوپێشچوونە لە ڕێکارە گومرگییەکان بۆ ئیدارەدانی بارەکان.

ئامانجی پەرەپێدانی سیستمی ترانزێت

دەستەی گشتیی گومرگی عێراق لەبارەی ئامانجی پەرەپێدانی ئەم سیستمەوە ڕایگەیاند، ئەم دەستکەوتە جێبەجێکردنی فەرمانی وەزیری داراییە بۆ پەرەپێدانی سیستمی ترانزێت و کردنی عێراق بە پێگەیەکی لۆجستیی هەرێمی لە ڕێگەی ئاسانکردنی ڕێکارەکان و چاودێریکردنی بارەکان بەگوێرەی پێوەرە نێودەوڵەتییەکان و زیادکردنی داهاتی نانەوتی.

چاودێریکردنی بارەکان بە تەکنەلۆجیای هاوچەرخ

ئاماژە بەوەش کراوە، ئەو بارە لە ڕێگەی جی پی ئێس (GPS)ـەوە لە خاکی عێراقدا چاودێری کراوە و بەڕێکوپێکی و بەپێی پێوەرە نێودەوڵەتییەکانی پرۆسەی ترانزێتی تێدا پەیڕەو کراوە.

زیادبوونی متمانە بە ڕێڕەوی بازرگانیی عێراق

ئەم هەنگاوەی گواستنەوەی بار بە ڕێگەی ترانزێت لە عێراق لەکاتێکدایە، عێراق دەیەوێت داهاتی نانەوتی زیاد بکات؛ پێستریش بەڕێوەبەری کۆمپانیای گشتیی گواستنەوەی وشکانی ڕایگەیاندبوو، زیادبوونی گەشتە وشکانییەکان و سیستمی ترانزێت بۆ گواستنەوەی بارەکان، بەبێ پشکنینی گومرگیی توند، وایکردووە متمانە بە ڕێڕەوی بازرگانیی عێراق و قەبارەی ئاڵوگۆڕی بازرگانییش لەناو وڵاتەکەدا زیاد بکات.

پێشبینییەکان بۆ داهاتووی گەشتە وشکانییەکان

بەڕێوەبەری کۆمپانیای گشتیی گواستنەوەی وشکانی لەبارەی داهاتووی گەشتە وشکانییەکانەوە ڕایگەیاند، لە داهاتوودا گەشتە وشکانییەکان زیادبوونێکی گەورە بەخۆیانەوە دەبینن، بەتایبەتی لە پاش کردنەوەی دەروازەی ڕەبیعە (عێراق - سووریا)؛ پێشبینیش دەکەن لە ئەمساڵدا، گەشتە وشکانییەکانی ترانزێت لە دەروازەکان، دوو هەزار گەشت تێپەڕێنێت، لەکاتێکدا لە ساڵی 2025ـدا هەزار گەشت بووە؛ وەک ئەوەی کەناڵ8 پێشتر بڵاوی کردووەتەوە.