گوتەبێژی حکومەتی عێراق ڕایگەیاند، سەرۆکوەزیرانی نوێی وڵات هیچ مووچەیەک لە دەوڵەت وەرناگرێت و ئامانجی سەرەکیی ڕزگارکردنی ئابوورییە لە ڕێگەی کەمکردنەوەی پشتبەستن بە نەوت و ڕووبەڕووبوونەوەی گەندەڵی بەبێ حساباتی سیاسی.

سەربەخۆیی سیاسی و ڕەتکردنەوەی مووچە

حەیدەر عەبوودی، گوتەبێژی حکومەتی عێراق ڕایگەیاند، عەلی زەیدی سەرۆکوەزیران بەڵێنیداوە هیچ مووچەیەک لە دەوڵەت وەرناگرێت، چونکە پێویستی پێی نییە. ئاماژەی بەوەش کرد، زەیدی خۆی لە گرێکوێرەی هەوڵدان بۆ خولی دووەمی سەرۆکایەتی ڕزگار کردووە؛ ئەو بەشداریی هەڵبژاردن ناکات، نابێتە بەشێک لە هیچ ئەجێندایەکی سیاسی و پڕۆژەی دامەزراندنی پارتی نییە. ئەمەش وایکردووە لە مامەڵەکردن لەگەڵ دۆسیەی گەندەڵیدا بێ هیچ فشار و حساباتێکی پێشوەختە تەنیا بۆ بەرژەوەندیی گشتی کار بکات.

ستراتیژی کەمکردنەوەی پشتبەستن بە نەوت

حکومەتی نوێ پلانێکی 10 ساڵەی داڕشتووە کە تێیدا عەلی زەیدی سەرۆکایەتی لیژنەیەکی پسپۆڕ دەکات بۆ کەمکردنەوەی پشتبەستنی بودجەی وڵات بە نەوت. ئامانجەکە ئەوەیە پشتبەستن بە داهاتی نەوت لە 90%ـەوە بۆ 45% کەم بکرێتەوە. ئەمەش لە ڕێگەی زیادکردنی داهاتە نانەوتییەکان، کۆنترۆڵکردنی دەروازە سنوورییەکان، ڕێکخستنەوەی گومرگ و چالاککردنی سیستمی باج جێبەجێ دەکرێت.

ئەنجوومەنی سەقامگیریی دارایی و پرسی مووچە

سەرۆکوەزیران لە ژێر ناوی "ئەنجوومەنی سەقامگیریی دارایی" هەموو ئەو دامەزراوانەی کۆکردووەتەوە کە پەیوەندییان بە سیاسەتی نەختینەیی و داراییەوە هەیە، وەک بانکی ناوەندی و وەزارەتی دارایی. لە ئێستادا حکومەت پێویستی بە دابینکردنی مانگانە کەمتر لە 10 تریلیۆن دینار هەیە بۆ پابەندبوونەکان بە مووچە و خەرجییە گشتییەکان. حکومەت پشتی بە چارەسەری ناوخۆیی بەستووە و پەنای بۆ قەرزی دەرەکی نەبردووە، ئەمەش وەک هەنگاوێک بۆ پاراستنی مووچەی فەرمانبەران.

سیاسەتی دراو و نرخی ئاڵوگۆڕ

گوتەبێژی حکومەتی عێراق ڕەتیکردەوە هیچ ئارەزوویەک بۆ چاپکردنی دراوی نوێ یان گۆڕینی نرخی ئاڵوگۆڕی دۆلار هەبێت. جەختی لەوە کردەوە کە بەرزکردنەوەی نرخی دۆلار بۆ قەرەبووکردنەوەی نەختینەی لەدەستچوو خزمەت بە هاووڵاتییان ناکات و دەبێتە بارگرانی بەسەریانەوە، بۆیە حکومەت پەنا بۆ ئەو جۆرە ڕێکارانە نابات.

متمانە و تەمەنی حکومەت

تەمەنی حکومەتی نوێی عێراق تەنیا 1 مانگ و 9 ڕۆژە، بەڵام بەگوتەی حەیدەر عەبوودی، بە شێوازێکی بوێرانە لە دۆسیە هەستیارەکان نزیک بووەتەوە. ئامانجی سەرەکیی حکومەت لەم قۆناغەدا گەڕاندنەوەی متمانەیە لەنێوان هاووڵاتییان و دەسەڵات، لە ڕێگەی شەفافییەت و کارکردنی کردەیی لەسەر دۆسیە دارایی و ئابوورییەکان.