دادگایەکی ئەڵمانیا سزای زیندانیی هەتاهەتایی بەسەر پزیشکێکی دەروونیی سعودیدا سەپاند، کە لە ساڵی 2024 بە ئۆتۆمبێلەکەی هێرشی کردبووە سەر بازاڕێکی کریسمس و بەو هۆیەوە 6 کەس کوژران و زیاتر لە 300 کەسی دیکەش بریندار بوون، دادگاش ڕایگەیاندووە کە تاوانەکە توندوتیژییەکی تایبەت بووە.

سزادانی پزیشکێکی سعودی لە ئەڵمانیا

ئەمڕۆ دادگایەکی ئەڵمانیا، سزای زیندانیی هەتاهەتایی بەسەر تاڵیب جەواد عەبدولموحسین، تەمەن 51 ساڵ، پزیشکێکی دەروونیی سعودیدا سەپاند، کە لە ساڵی 2024، ئۆتۆمبێلەکەی بەناو بازاڕێکی جەنجاڵی کریسمسدا لێخوڕی و 6 کەسی کوشت ولە 338 کەسی بریندار کرد.

توندوتیژیی تاوانەکە و ڕێکارەکانی دادگا

دادگا بڕیاریدا تاوانەکە توندوتیژییەکی تایبەت بووە، ئەمەش وایکرد ئازادبوونی عەبدولموحسین لە زیندان زۆر قورستر بێت.

دانپێدانانی تۆمەتبار لە دادگاییدا

تاڵیب جەواد عەبدولموحسین لە ماوەی دادگاییکردنەکەیدا دانی بەوەدا نا، کە لە 20ـی کانوونی یەکەمی 2024، بە ئۆتۆمبێلێکی جۆری بی ئێم دەبلیو ئێکس 3ـی قەبارە مامناوەند، کە زیاتر لە 340 هێزی ئەسپی هەبوو، بەناو خەڵکدا ڕۆیشتووە، بەڵام ڕەتیکردەوە بەمەبەست خەڵکی کردبێت بە ژێر ئۆتۆمبێلەکەیەوە.

ڕاپۆرتی پزیشکیی دەروونی لەسەر تۆمەتبار

پسپۆڕێکی دەروونیی تاقیکردنەوەی بۆ تۆمەتبارەکە ئەنجامداوە و بە نەخۆشیی کەسایەتیی نێرگزی دەستنیشانی کردووە، بەڵام ئاشکراشی کرد، بە تەواوی بەرپرسیارە لە ڕووی تاوانکارییەوە و هێشتا مەترسیدارە.

باگراوەندی تۆمەتبارەکە لە ئەڵمانیا

عەبدولموحسین، کە لە ساڵی 2006 گەیشتە ئەڵمانیا، پێشتر دەسەڵاتدارانی ئەڵمانیای تۆمەتبار کردبوو بەوەی بە شێوەیەکی گونجاو ئەو سعودییانەیان نەپاراستووە، کە بەهۆی هۆکاری ئایینی یان سیاسییەوە لە وڵاتەکەیان هەڵاتوون.