سەرۆکوەزیرانی عێراق وردەکاریی ستراتیژیی نوێی حکومەتەکەی بۆ بەرەنگاربوونەوەی گەندەڵی و چاکسازیی دارایی ئاشکرا دەکات؛ جەخت لە گەڕاندنەوەی دەیان ملیار دینار بۆ خەزێنەی گشتی دەکاتەوە و ڕایدەگەیەنێت، کار بۆ ئەوە دەکەن لە 3 ساڵی داهاتوودا ئاستی بەرهەمهێنانی نەوت بۆ 7 ملیۆن بەرمیل لە ڕۆژێکدا بەرز بکەنەوە.

گەڕاندنەوەی پارە بە خەزێنەی دەوڵەت

سەرۆکوەزیرانی عێراق لەبارەی بەرەنگاربوونەوەی گەندەڵی و پاراستنی سامانی گشتی ڕایگەیاند، لە ڕێگەی ڕێکاری یاساییەوە دەستیان بە بەرەنگاربوونەوەی گەندەڵی کردووە، بەفیڕۆدانی پارەیان ڕاگرتووە و دەیان ملیار دیناریشیان بۆ خەزێنەی دەوڵەت گەڕاندووەتەوە.

هەنگاوەکانی حکومەت بۆ چاکسازیی دارایی

عەلی زەیدی، سەرۆکوەزیرانی عێراق لەبارەی سروشتی گەندەڵی و پێکهێنانی لیژنەی وردبینی بۆ گرێبەستەکان لە دیمانەیەکدا ڕایگەیاند، گەندەڵی لە عێراق دیاردەیەکە لە ئاستە بچووکەکانەوە دەست پێ دەکات و لە ڕێگەی سیستمی بەرتیلەوە درێژ دەبێتەوە، چارەسەرکردنی پێویستی بە چاکسازیی گشتگیر و بەردەوام هەیە، هەر بۆیە لەو چوارچێوەیەدا لیژنەیەکی ناوەندییان بۆ پێداچوونەوە بەو گرێبەستانەی کە بڕەکەی 25 ملیار دیناری تێپەڕاندووە پێکهێناوە، بۆ وردبینیکردن و دڵنیابوون لە دروستیی خەمڵاندنە داراییەکانیان و ڕێگریکردن لە هەڵاوسانی تێچووی خەمڵێنراو.

پێگەی بەرپرسان لە ڕووبەڕووبوونەوەی ئاستەنگەکاندا

زەیدی لەبارەی دەستنەگرتن بە پۆستەکان و کاریگەریی لەسەر بڕیارەکان دەشڵێت، دەستنەگرتن بە پۆستەکانەوە پێگەیەکەی بەهێز دەدات بە بەرپرس بۆ ڕووبەڕووبوونەوەی ئاستەنگەکان، ئەوانیش بەردەوامن لە کارکردن بۆ گەیشتن بە ئامانجەکانیان.

پێکهێنانی لیژنەی چاودێریی و وردبینیی پێشوەختە

عەلی زەیدی لەبارەی ڕەوانەکردنی ڕەشنووسی یاسایەکی نوێ بۆ پەرلەمان ئاشکرای کرد، ئەنجوومەنی وەزیرانی عێراق ڕەزامەندی دەربڕیوە لەسەر ڕەوانەکردنی ڕەشنووسی یاسایەک بۆ ئەنجوومەنی نوێنەران بۆ پێکهێنانی لیژنەیەکی چاودێریی و وردبینیی پێشوەختە، لە هەموو وەزارەت و دامەزراوەکانی دەوڵەت، ئەمەش بە گوتەی ئەو؛ ڕێکارەکانی شەفافییەت و سیستمی بەڕێوەبردن بەهێز دەکات و کارایی بەڕێوەبردنی دارایی گشتی بەرز دەکاتەوە.

داهاتی نەوت و ئاسۆی بەرهەمهێنان لە عێراق

لەبارەی نەوتیشەوە کە 84%ـی داهاتی عێراق پێکدەهێنێت، عەلی زەیدی ڕایگەیاندووە، دەیانەوێت لە 3 ساڵی داهاتوودا ئاستی بەرهەمهێنانی نەوتی عێراق بۆ 7 ملیۆن بەرمیل لە ڕۆژێکدا بەرز بکەنەوە و کۆمپانیا ئەمریکییەکانیشیان لەو دیدگایە ئاگادار کردووەتەوە.

کارتێکەریی قەیرانە ناوچەییەکان لەسەر هەناردە

سەرۆکوەزیرانی عێراق لەبارەی دابەزینی هەناردەی نەوت و پشکی وڵات لە ئۆپیک ڕوونیکردەوە، لە ئەنجامی قەیرانە ناوچەییەکان، هەناردەکردنی نەوتی عێراق دابەزیوە و کار بۆ گەڕاندنەوەی توانای تەواوی هەناردەکردن و دەستەبەرکردنی پشکێکی دادپەروەرانە بۆ عێراق لە بەرهەمهێنانی نەوتی ئۆپیک دەکەن، کە هاوتابێت لەگەڵ تواناکانی وڵات.

هەماهەنگی لەگەڵ کۆمپانیا جیهانییەکان لە کەرتی وزەدا

سەرۆکوەزیرانی عێراق لەبارەی بڕیارەکانی ئەنجوومەنی وزاری و پڕۆژە گەورەکانی نەوت ئاشکرای کرد، ئەنجوومەنی وزاری بۆ ئابووری، بڕیاری گرنگی سەبارەت بە پڕۆژە گەورەکانی نەوت لەگەڵ کۆمپانیا نێودەوڵەتییەکان داوە، لەوانەش؛ کۆمپانیای شیڤرۆن، هالیبێرتۆن و ئێچ کەی ئێن، ئەمە جگە لەوەی دەرفەتی کارکردنیان لە کێڵگە نوێیەکان و بلۆکی گەڕان داوە.