دەستەی بازرگانیی دەریایی بەریتانیا ڕایگەیاند کە کەشتییەکی نەوتهەڵگر لە گەرووی هورمز بە مووشەک کراوەتە ئامانج، ئەمەش وەک 2ـەم هێرش بۆ سەر کەشتییەکان لەو ناوچەیە لە دوای گرژییەکانی دوایی تۆمار دەکرێت. لە کاتێکدا تیمی کەشتییەکە سەلامەتن، ئەمریکا و ئێران یەکدی بە پێشێلکردنی یاداشتی لێکتێگەیشتنی نێوانیان تۆمەتبار دەکەن؛ ئێران هێرشەکە بۆ بەکارهێنانی ڕێڕەوی ڕێگەپێنەدراو لەلایەن کەشتییەکانەوە دەگەڕێنێتەوە و ئەمریکاش جەخت لەسەر ئازادیی کەشتیوانی و نەدانی هیچ بڕە پارەیەک لە کاتی تێپەڕیندا دەکاتەوە.

هێرشکردنە سەر کەشتییەکی نەوتهەڵگر لە گەرووی هورمز

دەستەی بازرگانیی دەریایی بەریتانیا ڕایگەیاند، ڕاپۆرتێکیان پێگەیشتووە سەبارەت بە هێرشکردنە سەر کەشتییەکی نەوتهەڵگر لە گەرووی هورمز، کە بە مووشەک کراوەتە ئامانج.

سەلامەتیی تیمی کەشتییەکە و زیانە ماددییەکان

دەستەی بازرگانیی دەریایی بەریتانیا لە ڕاگەیەندراوێکدا ئاماژەیان بەوە کردووە، تیمی دەریاوانیی کەشتییەکە سەلامەتن و تەنیا زیانی ماددی بەر کەشتییەکە کەوتووە.

پەرەسەندنی گرژییەکانی نێوان ئەمریکا و ئێران

ئەمە 2ـەم هێرشە بۆ سەر کەشتییە دەریاییەکان لە گەرووی هورمز، دوای ئەوەی لە ڕووداوێکی هاوشێوەدا ئێوارەی پێنجشەممە بووە هۆی زیان گەیاندن بە کەشتییەکی بارهەڵگر، کە ئەمریکا ئێرانی بە ئەنجامدانی تۆمەتبار کرد و لە وەڵامی ئەو هێرشەدا شەوی ڕابردوو چەند هێرشێکی سنوورداریان بۆ سەر هێزی دەریایی ئێران ئەنجام دا.

تۆمەتبارکردنی دوولایەنە بە پێشێلکردنی ئاگربەست

ئەمریکا و ئێران یەکدی بە پێشێلکردنی ئاگربەست و یاداشتی لێکتێگەیشتنی نێوانیان تۆمەتبار دەکەن، ئێران دەڵێت، هێرشەکەیان بە هۆکاری بەکارهێنانی ڕێڕەوی ڕێگەپێنەدراو بووە لەلایەن کەشتییەکانەوە و بە گوتەی ئەوان، لە ماددەی 5ـەمی یاداشتی لێکتێگەیشتندا هاتووە، کە پێویستە جموجوڵی کەشتیوانی لە گەرووی هورمز لەلایەن ئێرانەوە بەڕێوە ببرێت، دەشڵێن ڕێگە نادەن بە کردنەوەی ڕێڕەوی دەریایی نوێ لەو گەرووە.

هەڵوێستی ئەمریکا لەسەر ئازادیی کەشتیوانی

لە بەرامبەردا ئەمریکا جەخت لە ئازادیی جموجوڵی کەشتیوانی و نەدانی هیچ بڕە پارەیەک لەلایەن کەشتییەکانەوە دەکاتەوە، لە کاتی تێپەڕینیاندا بە گەرووی هورمز و ئەمەش وەکوو خاڵێکی پابەندکەر بۆ ئێران لێک دەدەنەوە، کە بە گوتەی ئەوان، لە لێکتێگەیشتنەکەی نێوانیاندا لەسەری ڕێککەوتوون.