وەزارەتی دەرەوەی بەحرەین ڕایگەیاند کە سەرلەبەیانی ئەمڕۆ ئێران بە چەند فڕۆکەیەکی بێفڕۆکەوان (درۆن) هێرشی کردووەتە سەر وڵاتەکەیان و ژێرخانی سڤیلی کردووەتە ئامانج؛ لە بەرامبەریشدا وڵاتی ئیمارات سەرکۆنەی هێرشەکەی کرد و تاران بە تێکدانی هەوڵەکانی ئاشتی لە ناوچەکەدا تۆمەتبار دەکرێت.

پێشێلکردنی ڕێککەوتنە نێودەوڵەتییەکان

وەزارەتی دەرەوەی بەحرەین لە ڕاگەیەندراوێکدا جەخت لەوە دەکاتەوە، هێرشەکە پێشێلکردنی ئاشکرای بەها و ڕێککەوتنە نێودەوڵەتییەکان و بەئامانجگرتنی ژێرخانی سڤیل و هاووڵاتییانی بێتاوانە، هاوکات ئیماراتیش سەرکۆنەی هێرشەکەی ئێرانی کرد و بە "دوژمنکارانە" ناوی برد.

بەرپرسیارێتیی تێکدانی هەوڵەکانی ئاشتی

وەزارەتی دەرەوەی بەحرەین لەبارەی هەوڵە هەرێمی و نێودەوڵەتییەکان بۆ کەمکردنەوەی گرژییەکان دووپاتی دەکاتەوە، بەردەوامیی هێرشەکانی ئێران لە کاتێکدایە، هەوڵە هەرێمی و نێودەوڵەتییەکان بە ئاراستەکردنی کەمکردنەوەی گرژییەکانن و لەبارەی تێکدانی ئارامییشەوە دەشڵێت: "بەرپرسیارێتیی تێکدانی هەوڵەکانی ئاشتی دەخەینە ئەستۆی تاران".

پاراستنی سەروەری و داوای لێپرسینەوە

وەزارەتی دەرەوەی بەحرەین لەبارەی پاراستنی سەروەریی وڵاتەکەیان ئەوەشی خستووەتە ڕوو، بە مافی خۆیانی دەزانن، بەگوێرەی یاسا نێودەوڵەتییەکان بەرگری لە سەروەری و ئاسایش و سەقامگیریی وڵاتەکەیان بکەن، داواش لە ئەنجوومەنی ئاسایشی نەتەوە یەکگرتووەکان دەکەن، بەرپرسیارێتیی خۆیان لە جێبەجێکردنی بڕیارنامەکەیان بگرنە ئەستۆ و لێپرسینەوە لە پێشێلکاران بکەن.