د.باوەڕ بەختیار، پزیشکی پسپۆڕی هەناوی، چەند ڕێنماییەک سەبارەت بە پەیوەندیی نێوان فشاری دەروونی و بەرزەفشاری خوێن دەخاتەڕوو.

پەیوەندیی نێوان خەمخواردن، فشاری دەروونی و بەزربوونەوەی فشاری خوێن

د.باوەڕ بەختیار دەڵێت '' بەشێک لە چارەخوازان پرسیار دەکەن و دەڵێن دکتۆر ئایا نیگەرانی و خەمخواردن کاریگەریی لەسەر فشاری خوێنم هەیە؟ ''

بەڵێ، کاتێک مرۆڤ تووشی خەمخواردن، ترس یان فشاری دەروونی دەبێت، جەستە دەچێتە حاڵەتی بەرگریکردنەوە، بە ئەم شێوەیە:

1. دەردرانی هۆرمۆنەکان: جەستە هۆرمۆنەکانی فشار(وەک ئەدریناڵین) دەردەدات
2. خێرا بوونی لێدانی دڵ: ئەم هۆرمۆنانە وادەکەن دڵ بە خێرایی لێبدات
3. تەسکبوونەوەی بۆرییەکانی خوێن: بۆرییەکانی خوێن بچووکتر دەبنەوە، ئەمەش وادەکات خوێن بە فشارێکی زیاتردا تێبپەڕێت و فشاری خوێن بەرز ببێتەوە

چۆن کۆنتڕۆڵی خەمخواردن و فشاری دەروونی بکەین؟

1. هەناسەی قوڵ: یارمەتیی ئارامکردنەوەی سیستمی دەماری دەدات
2. جوڵەی ڕۆژانە: 20بۆ30 خولەک ڕۆیشتن، فشاری دەروونی کەم دەکاتەوە
3. خەوی باش: شەوانە حەوت بۆ هەشت کاتژمێر خەوتن فشاری خوێن بە جێگیری دەهێڵێتەوە
4. گفتوگۆکردن: بارگرانییە دەروونییەکان کەم دەکاتەوە
5. تێبینی: ئارامیی دەروونی، دەرمانێکی سروشتییە بۆ ڕێکخستنی بەرزەفشاری خوێن