لە ناوچەی سەوزی بەغداد درۆنێک خرایە خوارەوە
شەوی ڕابردوو ئاسمانی ناوچەی سەوزی بەغداد ئاڵۆزیی بەخۆیەوە بینی و هێزە ئەمنییەکان بە چەکی قورس ڕووبەڕووی فڕۆکەیەکی بێ فڕۆکەوان بوونەوە و تێکیان شکاند.
خستنەخوارەوەی درۆنەکە لە ناوچەی سەوز
درەنگانی شەوی ڕابردوو درۆنێک بەسەر ئاسمانی ناوچەی سەوز لە بەغداد سوڕاوەتەوە، هێزە ئەمنییەکان بە بەکارهێنانی چەکی قورس تەقەیەکی زۆریان لێکردووە و توانیویانە لە نزیک کۆشکی حکومی بیخەنە خوارەوە. دەنگی تەقەکان لە تەواوی ناوچەکە بیستراوە و بووەتە هۆی دروستبوونی دڵەڕاوکێ.
ڕاگەیەندراوی شانەی ڕاگەیاندنی ئەمنی
سەعد مەعن، سەرۆکی شانەی ڕاگەیاندنی ئەمنی ڕایگەیاند، هێزە ئەمنییەکان لە ناوچەی سەوز مامەڵەیان لەگەڵ فڕۆکەیەکی بێ فڕۆکەواندا کردووە و توانیویانە بیخەنە خوارەوە. جەختیشی کردەوە کە پڕۆسەی تێکشاندنی درۆنەکە هیچ زیانێکی گیانی یان ماددیی بەدوای خۆیدا نەهێناوە.
دۆخی هەستیاری ناوچەی سەوز
لە 28ـی مانگی ڕابردووەوە ناوچەی سەوز لە بەغداد دۆخێکی نائاسایی و هەستیار بەخۆیەوە دەبینێت. ئەم ئاڵۆزییانە دوای ئەوە هاتن کە هێزەکانی دژەتیرۆر بە سەرپەرشتی عەلی زەیدی، سەرۆکوەزیرانی عێراق، هەڵمەتێکی فراوانیان بۆ دەستگیرکردنی ژمارەیەک بەرپرس و ئەندامی پەرلەمان بە تۆمەتی گەندەڵی دەستپێکردووە.
2 کاتژمێر پێش ئێستا