مەرجەعی باڵای شیعەکان هۆشداری توند دەداتە هاووڵاتییان و لایەنە پەیوەندیدارەکان و فڕێدانی هەر جۆرە پاشماوەیەک بۆ ناو ڕووبارەکان بە "قەدەغە و تاوان" ناو دەبات.

بەرپرسیارێتی شەرعی و زیانی گشتی

نووسینگەی عەلی سیستانی، مەرجەعی باڵای ئایینی شیعەکان لە ڕاگەیێنراوێکدا ڕایگەیاندووە، فڕێدانی ئاوی ئاوەڕۆی چارەسەرنەکراو، پاشماوە ڕەقەکان، پاشماوە پزیشکییەکان و ماددە کیمیاییەکان بۆ ناو ڕووبارەکان کارێکی نادروستە. لە ڕاگەیێنراوەکەدا جەخت کراوەتەوە کە ئەم کارە دەبێتە هۆی زیانی گشتی بۆ خەڵک، هەر بۆیە هەر کەسێک ئەنجامی بدات، لە ڕووی شەرعییەوە تاوانبارە و بەرپرسیار دەبێت بەرامبەر ئەو زیانانەی بەو هۆیەوە دروست دەبن.

پابەندبوون بە یاسا و ڕێنماییەکان

مەرجەعییەتی باڵا ئاماژەی بەوە کردووە، کە بە هیچ شێوەیەک ڕێگەپێدراو نییە سەرپێچی ئەو یاسا و ڕێنماییانە بکرێت کە لەلایەن دامەزراوە تایبەتمەندەکانەوە بۆ پاراستنی ژینگە و ئاو دەرکراون. هەروەها داوای لە هاووڵاتییان کردووە کە بە حیکمەت و هەستکردن بە بەرپرسیارێتییەوە مامەڵە لەگەڵ ئەم بابەتە بکەن، چونکە پەیوەندی بە بەرژەوەندی گشتییەوە هەیە.

داواکاری بۆ دۆزینەوەی ڕێگەچارەی جێگرەوە

لە بەشێکی تری ڕاگەیێنراوەکەدا، نووسینگەی عەلی سیستانی داوا لە بەرپرسان و لایەنە پەیوەندیدارەکان دەکات، ڕێگەی جێگرەوە و گونجاو بۆ ڕزگاربوون لەو پاشماوە پزیشکی و کیمیایی و ئاوەڕۆیانە دابین بکەن، نەک بڕژێنرێنە ناو سەرچاوە ئاوییەکانەوە.

کاردانەوەی ڕێکخراوە ژینگەییەکان

بابەتی زیادەڕۆیی و سەرپێچیکردن بۆ سەر ڕووبارەکان، لە ماوەی ڕابردوودا کاردانەوەی فراوانی ڕێکخراوەکانی ژینگە، چالاکوانان و وەزارەتی ژینگەی لێکەوتووەتەوە. ئەم پرسە لەناو تۆڕە کۆمەڵایەتییەکاندا بووەتە باسی گەرم، بەتایبەت دوای ئەوەی ئاستی پیسبوونی ئاوی ڕووبارەکان لە هەندێک ناوچە مەترسی بۆ سەر تەندروستی گشتی دروست کردووە.