سەرۆکوەزیرانی عێراق لە کۆبوونەوەیەکدا لەگەڵ شێخە عەشایەرییەکان جەخت لەسەر سەروەریی یاسا دەکاتەوە و ڕادەستکردنی چەک بە دەوڵەت بە پێویستییەکی نیشتمانی ناو دەبات.

بەرەنگاربوونەوەی گەندەڵی و پاراستنی دامەزراوەکان

نووسینگەی سەرۆکوەزیرانی عێراق بڵاویکردەوە، عەلی زەیدی لەگەڵ ژمارەیەک لە شێخە عەشایەرییەکان کۆبووەتەوە. لە کۆبوونەوەکەدا زەیدی جەختی لە گرنگی پاراستنی قەوارەی دەوڵەتی عێراقی کردووەتەوە و ڕایگەیاندووە کە پێویستە بە توندی بەرەنگاری "ئافاتی گەندەڵی" ببنەوە، چونکە ئەو دیاردەیە هەڕەشەی ڕاستەوخۆ لە دامەزراوەکانی گەل دەکات.

کۆکردنەوەی چەک لە دەستی دەوڵەتدا

لە بەشێکی تری کۆبوونەوەکەدا، سەرۆکوەزیرانی عێراق جەختی لە بەردەوامبوونی پرۆسەی کۆکردنەوەی چەک لە دەستی دەوڵەتدا کردەوە. ئاماژەی بەوە کرد کە پێویستە چەک تەنیا لە ژێر کۆنتڕۆڵی دامەزراوە فەرمییەکاندا بێت، بە جۆرێک کە پاڵپشتی هێزە چەکدارەکان بکات بۆ ئەوەی بتوانن ڕۆڵی خۆیان لە پاراستنی ئاسایشی وڵاتدا بگێڕن.

ڕۆڵی عەشایەر لە چاکسازی و خزمەتگوزاریدا

عەلی زەیدی باسی لە ڕۆڵی گرنگی شێخە عەشایەرییەکان کرد بۆ پاڵپشتیکردنی پرۆسەی ڕادەستکردنی چەک و پابەندبوون بە یاساکان. داوای لێکردن کە دەسەڵات و پێگەی خۆیان بەکاربهێنن بۆ سەرخستنی بەرنامەی خزمەتگوزارییەکانی حکومەت و هەنگاوەکانی چاکسازیی ئابووری کە ئامانج لێی باشترکردنی بژێوی خەڵکە.

هەڵوێستی شێخە عەشایەرییەکان

لە بەرامبەردا، ئامادەبووانی کۆبوونەوەکە پشتیوانی خۆیان بۆ هەوڵەکانی حکومەت دەربڕی. شێخە عەشایەرییەکان دەستخۆشییان لە هەنگاوەکانی زەیدی کرد بۆ پاراستنی داهات و سەرچاوەکانی دەوڵەت و جێبەجێکردنی یاسا لە بەرەنگاربوونەوەی گەندەڵکاراندا، هەروەها جەختیان لە پتەوکردنی پێگەی دەوڵەت و سەروەرییەکەی کردەوە.