سەرەڕای بەردەوامیی پرۆسەی ئاشتی، ماوەی مانەوەی ئەو کەسەی وەک قەیووم لە جێگەی ئەحمەد تورک دانراوە، درێژکرایەوە، بەو جۆرەش تورک لانیکەم تاوەکو 2 مانگی دیکە، ناتوانێت بگەڕێتەوە سەر ئەرکەکەی.

دوورخستنەوەی ئەحمەد تورک لە پۆستەکەی

لە 4ـی تشرینی دووەمی 2024، ئەحمەد تورک لەسەر دۆسیەی تیرۆر، لە پۆستی سەرۆکی شارەوانیی مێردین دوورخرایەوە و قەیووم لە جێگەی دانرا.

هۆکاری دانانی قەیووم لەلایەن وەزارەتی ناوخۆوە

وەزارەتی ناوخۆ لەبارەی هۆکاری دوورخستنەوەی ئەحمەد تورکەوە ئەو کات ئاماژەی بەوە کردبوو، لەسەر ئەوەی دۆسیەکە لە دادگای ئەنقەرە بەردەوامە و یەکلانەبووەتەوە، قەیوومیان لە جێگەی ئەحمەد تورک داناوە.

بێتاوانبوونی ئەحمەد تورک و نەگەڕانەوەی بۆ سەر کارەکەی

سەرەڕای ئەوەی لە تشرینی یەکەمی 2025، ئەحمەد تورک لەو دۆسیەیە بێتاوان دەرچوو، بەڵام نەگەڕێنرایەوە سەر ئەرکەکەی.

بڕیاری نوێی وەزارەتی ناوخۆی تورکیا

وەزارەتی ناوخۆی تورکیا لە نوێترین بڕیاردا لەبارەی وادەی نوێی کارکردنی قەیوومەوە ڕایگەیاند، ماوەی مانەوەی ئەو کەسەی تاوەکو 4ـی ئەیلوولی ئەمساڵ درێژکردووەتەوە، کە وەک قەیووم لە جێگەی تورک دانراوە.

درێژکردنەوەی پێشووی ماوەی قەیووم

وەزارەتەکە پێشتر ماوەی مانەوەی قەیوومی لە پۆستەکەی، تاوەکو 4ـی تەممووز درێژ کردبووەوە.

داواکارییەکەی دەوڵەت باخچەلی بۆ گەڕانەوەی ئەحمەد تورک

دەوڵەت باخچەلی، سەرۆکی مەهەپە تاوەکو ئێستا چەند جارێک داوای کردووە، ئەحمەد تورک بگەڕێنرێتەوە سەر ئەرکەکەی، بەڵام تاوەکو ئێستا ئەو داواکارییە جێبەجێ نەکراوە.