دادگای تاوانەکانی بەرەنگاربوونەوەی گەندەڵی لە عێراق ئاشکرای دەکات، چەند سەرانەوەرگرێک دۆسیەی عەدنان جومەیلی، بریکاری دەستبەسەرکراوی وەزارەتی نەوتیان قۆزتووەتەوە بۆ هەڕەشەکردن و وەرگرتنی پارە لە بازرگانان؛ دادگای ناوبراو داوا لە هاووڵاتییان دەکات نەکەونە داوی ئەو چەواشەکارییانەوە و لە کاتی ڕوودانی کاری وەهادا دادگا ئاگادار بکەنەوە.

قۆستنەوەی دۆسیەی بریکاری وەزارەتی نەوت

دادوەریی لێکۆڵینەوەی دەستپاکی دادگای تاوانەکانی بەرەنگاربوونەوەی گەندەڵی عێراق ڕایگەیاند، چەند فێڵبازێک دۆسیەی عەدنان جومەیلیان قۆزتووەتەوە بۆ وەرگرتنی سەرانە و هەڕەشەکردن لە بازرگانان.

بانگەشەی ناڕاست و هەڕەشە لە بازرگانان

دادوەر زیا جەعفەر، دادوەری لێکۆڵینەوەی دەستپاکی دادگای تاوانەکانی بەرەنگاربوونەوەی گەندەڵی ناوەندی ڕاگەیەندراوێکی بڵاوکردەوە و ئاماژە بەوە دەکات، هەندێک کەسی سەرانەوەرگر و فێڵباز لە چەندین لایەنی فەرمی و نافەرمی هەوڵ دەدەن بارودۆخ و ڕێڕەوی لێکۆڵینەوەکانی تایبەت بە تۆمەتباری دەستبەسەرکراو (عەدنان جومەیلی، بریکاری وەزارەتی نەوت) بقۆزنەوە، ئەوەش لە ڕێگەی پەیوەندیکردن بە بازرگانان و بانگەشەکردنی ئەوەی کە ناویان لە لێکۆڵینەوەکاندا هاتووە بە مەبەستی وەرگرتنی پارە و سەرانە لێیان.

ئاگادارکردنەوەی دادگا لە سەرانەوەرگرتن

دادوەری لێکۆڵینەوەی دەستپاکی دادگای تاوانەکانی بەرەنگاربوونەوەی گەندەڵی ناوەندی لەبارەی وەرگرتنی سەرانە لە بازرگانان گوتی، داوا لە هاووڵاتییان و بەتایبەتی بازرگانان دەکەین کە بڕوا بەم درۆیانە نەکەن و هیچ جۆرە سەرانەیەک نەدەنە ئەو کەسانە، هەروەها داواکارن لە کاتی ڕوودانی کارێکی وەها دادگا ئاگادار بکەنەوە.

ڕەتکردنەوەی زانیاریی کەناڵە ئاسمانییەکان

زیا جەعفەر لەبارەی زانیاریی چاوپێکەوتنە تەلەڤیزیۆنییەکانەوە ڕوونی کردەوە، تێبینی چەند تۆمار و چاوپێکەوتنێکی تەلەڤیزیۆنی لە ژمارەیەک کەناڵی ئاسمانی کراوە کە تێیدا میوانەکان زانیارییان دەربارەی لێکۆڵینەوەکان خستووەتە ڕوو، کە زۆربەیان نادروست بوون و هیچ پەیوەندییەکیان بە ڕاستییەوە نەبووە.

گرتنەبەری ڕێکاری توندی یاسایی

دادوەر زیا جەعفەر جەختیشی کردەوە، دادگا توندترین ڕێکاری یاسایی بەرامبەر ئەنجامدەرانی ئەو کردەوانە دەگرێتە بەر، کە هەوڵ دەدەن کار و ماندووبوونی دادگا، حکومەت و دەزگاکانی تایبەت بە بەرەنگاربوونەوەی گەندەڵی بشێوێنن.