ئیمانوێل ماکرۆن، سەرۆکی فەڕەنسا ڕایگەیاند، کەشتیی فڕۆکەهەڵگری شارل دی گۆل ڕۆژهەڵاتی ناوەڕاستی بەجێهێشتووە و گەڕاوەتەوە وڵاتەکەی، ئەمەش دوای زیاتر لە 2 هەفتە دێت لە واژۆکردنی یاداشتی لێکتێگەیشتنی نێوان ئەمریکا و ئێران.

هۆکاری گەڕانەوەی کەشتییە فڕۆکەهەڵگرەکە

ئیمانوێل ماکرۆن، سەرۆکی فەڕەنسا لەبارەی گەڕانەوەی کەشتییەکەوە لە تۆڕی ئێکس ڕایگەیاند، بە لەبەرچاوگرتنی ئەو پێشهاتە ئەرێنییەی لە واژۆکراوی یاداشتی نێوان ئێران و ئەمریکادا هاتووەتە ئاراوە، کەشتییە فڕۆکەهەڵگرەکەیان گەڕاوەتەوە بۆ بەندەری تۆلۆن لە فەڕەنسا.

مانەوەی کەرستەکانی هەڵگرتنەوەی مین

سەرۆکی فەڕەنسا ئاماژەی بەوە کرد، ئەو کەرستانەی بەکاردەهێنرێت بۆ هەڵگرتنەوەی مینەکان بە جێگیری دەمێننەوە و ئامادەن لەگەڵ هاوبەشەکانیان لە ناوچەکە دەستوەردان بکەن.

ئەرکی کەشتییەکە لە گەرووی هوورمز

کەشتیی فڕۆکەهەڵگری شارل دی گۆل لە ناوەڕاستی مانگی ئایاری ئەمساڵدا گەیشتە ناوچەی کەنداو، بەگوتەی ئەلیس ڕوفۆ، وەزیری دەرەوەی فەڕەنسا، کەشتییەکە لە ئامادەباشیدا بووە بۆ ئەرکێکی ئەگەریی بێلایەنانە، بە مەبەستی دەستەبەرکردنی ئازادیی جموجوڵی کەشتیوانی لە گەرووی هوورمز.

هێرشەکانی سەر ئێران و واژۆکردنی یاداشتی لێکتێگەیشتن

جووڵاندنی کەشتییە فڕۆکەهەڵگرەکەی فەڕەنسا دوای سەرهەڵدانی جەنگ و ناکۆکییەکان هات لە ناوچەکە، بەهۆی هێرشەکانی ئەمریکا و ئیسرائیل بۆ سەر ئێران، کە لە 28ـی شوباتدا دەستیان پێکرد، دواتر تاران و واشنتن لە 17ـی حوزەیراندا یاداشتێکی لێکتێگەیشتنیان واژۆکرد بۆ کۆتاییهێنان بە جەنگ و زەمینەخۆشکردن بۆ دانوستان، بە ئامانجی گەیشتن بە ڕێککەوتنی کۆتایی لە ماوەی 60 ڕۆژدا.