کەناڵ 12ی ئیسرائیلی لەبارەی ئەگەری دەستپێکردنەوەی جەنگ لە غەززە ڕایگەیاند، هەڵسەنگاندنێکی وڵاتەکەی بڵاو کردووەتەوە و ئاشکرای کردووە لە 2 مانگی داهاتوودا ڕەنگە جەنگی غەززە دەست پێ بکاتەوە، هۆکاری دەستپێکردنەوەی جەنگیش بۆ پێشێلکردنی ڕێککەوتنەکە لەلایەن بزووتنەوەی حەماسەوە دەگەڕێنێتەوە.

ئەگەری پێشێلکردنی ئاگربەست لەلایەن حەماسەوە

بەگوێرەی کەناڵەکە، پێشبینییەکان بە جۆرێکن ئەنجوومەنی ئاشتی لە ماوەی 2 مانگ بۆ 3 مانگی داهاتوو ڕادەگەیەنێت کە بزووتنەوەی حەماس ئاگربەستی پێشێل کردووە و تاوەکو ئێستا چەکی دانەماڵیوە.

ڕۆڵی ئەنجوومەنی ئاشتی و بنیاتنانەوەی غەززە

ئەنجوومەنی ئاشتیش کە لەلایەن دۆناڵد ترەمپ، سەرۆکی ئەمریکا سەرۆکایەتی دەکرێت، چاودێریی پرۆسەی دووبارە بنیاتنانەوەی غەززە دەکات، لیژنەی نیشتمانیش، بەڕێوەبردنی کارەکانی ژیانی ڕۆژانەی هاووڵاتییانی غەززەی گرتووەتە ئەستۆ.

جموجۆڵە سەربازییەکانی سوپای ئیسرائیل

هەر بەگوێرەی کەناڵەکە، سوپای ئیسرائیل دەچێتە ئەو سنوورانەی ئێستا لەژێر دەسەڵاتی خۆی نییە، ئەمەش وا دەکات جارێکی دیکە جەنگ لە کەرتی غەززە دەست پێ بکاتەوە.

مەرجی ئیسرائیل بۆ وەستاندنی یەکجاریی جەنگ

لە ئاگربەست و ڕێککەوتنەکانی پێشووشدا، ئیسرائیل چەکدانانی حەماسی وەک مەرجێکی سەرەکیی وەستاندنی جەنگی کەرتی غەززە داناوە، بۆیە ئەگەر ئەو خاڵە جێبەجێ نەکرێت، ئەوا بە ئەگەری زۆرەوە ئیسرائیل باس لە دەستپێکردنەوەی جەنگ دەکات.

هەڵوێستی حەماس بەرامبەر خاڵەکانی ڕێککەوتنەکە

سەرچاوەیەکی سیاسی لەناو بزووتنەوەی حەماس لەبارەی دەستکاریی خاڵەکانی ڕێککەوتنەکەوە ڕایگەیاند، لە سەرەتای مانگی تەممووزی ئەمساڵدا بزووتنەوەکە سەرکەوتنی بەدەست هێناوە لەوەی لە ڕێگەی پەیوەندی لەگەڵ نێوەندگیرەکان، دەستکاریی ڕێککەوتن بکات و هەر خاڵێک باس لە خۆبەدەستەوەدانی بزووتنەوەکە دەکات بیگۆڕێت.