ڕوانگەی ئیکۆ عێراق لەبارەی یاسای بەرەنگاربوونەوەی تاوانەکانی تەکنەلۆجیای زانیارییەوە ڕایگەیاند، یاسای بەرەنگاربوونەوەی تاوانەکانی تەکنەلۆجیای زانیاری کە بڕیارە ڕۆژی دووشەممە لە ئەنجوومەنی نوێنەرانی عێراق خوێندنەوەی یەکەمی بۆ بکرێت، سزای دارایی و جەستەیی تێدایە کە لە هەندێکیاندا دەگاتە زیندانیی هەتاهەتایی.

پێکهاتەی ماددەکانی یاساکە

ڕوانگەی ئیکۆ عێراق لەبارەی ناوەڕۆکی پڕۆژەیاساکەوە دەڵێت، پڕۆژەیاسای بەرەنگاربوونەوەی تاوانە تەکنەلۆجییەکان لە 32 ماددە پێکهاتووە و چەندین خاڵی جیاواز لەخۆ دەگرێت.

لایەنە ئەرێنییەکانی پڕۆژەیاساکە

ڕوانگەکە ڕوونی دەکاتەوە، یەکێک لە لایەنە ئەرێنییەکانی ئەم یاسایە ئەوەیە کە ژینگەیەکی ئەمنی بۆ سیستمی کۆمپیوتەریی دامەزراوەکان و تاکەکان دابین دەکات و بەرەنگاری هەڕەشەی ئەلیکترۆنی، فێڵکردنی ئەلیکترۆنی و وتاری ئاژاوەگێڕیی تایفی لە ڕێگەی ئینتەرنێتەوە دەبێتەوە.

پاراستنی ژیانی تایبەتیی تاکەکان

ڕوانگەکە جەخت لەسەر ئەوە دەکاتەوە، پڕۆژەیاساکە سزای دارایی جۆراوجۆری تێدایە بەگوێرەی جۆری تاوانەکە، لەوانە بەزاندنی ژیانی تایبەت یان خێزانی لە ڕێگەی وێنە و ڤیدیۆگرتنەوە.

سزای بڵاوکردنەوەی زانیاریی ناڕاست

بەگوێرەی ڕاگەیەنراوی ڕوانگەکە، پێبژاردنی 35 ملیۆن دینار دەسەپێنرێت بەسەر هەر کەسێکدا کە هەواڵ و زانیاریی ناڕاست یان چەواشەکارانە بڵاو بکاتەوە بە مەبەستی کەمکردنەوەی متمانە بە سیستمی دارایی یان دراوەکان.

کاتی خوێندنەوەی پڕۆژەیاساکە

ڕاگەیەنراوی ڕوانگەی ئیکۆ عێراق لەکاتێکدایە، بڕیارە ڕۆژی دووشەممە لە دانیشتنی ئەنجوومەنی نوێنەرانی عێراقدا خوێندنەوەی یەکەم بۆ پڕۆژەیاسای تاوانەکانی تەکنەلۆجیای زانیاری بکرێت.