حوسییەکانی یەمەن لە هێرشێکی نوێدا بۆ سەر شاری حودەیدە، 14 سەربازی حکومەتیان کوشت، ئەمەش لە کاتێکدایە کە هەڕەشەی هێرشکردنە سەر فڕۆکەخانەکانی عەدەن و پێگە گرنگەکانی سعوودیە دەکەن، بەو بیانووەی ڕێگری لە نیشتنەوەی فڕۆکەیەکی ئێرانی کراوە، ئەمەش مەترسیی تێپەڕاندنی ئاگربەستی ساڵی 2022 دروست دەکات.

کات و شوێنی پێکدادانەکان لە حودەیدە

بەرپرسێکی حکومەتی دانپێدانراوی یەمەن لەبارەی وردەکاریی هێرشەکەی حودەیدەوە ڕایگەیاند، هێرشەکە ڕۆژی شەممە ڕوویداوە و چەند کاتژمێرێکی خایاندووە و هێزەکانی لایەنگری حکومەت بەرپەرچی هێرشەکەیان لە ناحیەی هایس لە باشووری حودەیدە داوەتەوە.

زیانی حوسییەکان لە ئەنجامی شەڕەکەدا

بەرپرسێکی حکومەتی دانپێدانراوی یەمەن لەبارەی کوژراو و بریندارەکانی نەیارەکانیانەوە ئاماژەی بەوەش کرد، "لە ئەنجامی شەڕەکەدا کوژراو و بریندار لەنێو ڕیزەکانی حوسییەکاندا هەبووە، بەڵام ئاماژەی بە ژمارەی کوژراوەکان نەکردووە".

دەرەنجامە مرۆییەکانی شەڕی 9 ساڵەی یەمەن

حوسییەکان لە ساڵی 2015ـەوە لەگەڵ حکومەتی یەمەن لە شەڕدان، بەهۆی ئەو شەڕەوە سەدان هەزار کەس کوژراون و قەیرانێکی گەورەی مرۆیی لە یەمەن سەری هەڵداوە.

دابەشبوونی ناوچەکانی ژێر دەسەڵاتی لایەنە نەیارەکان

حوسییەکان سەنعای پایتەختی یەمەن و بەشێکی زۆری باکووری وڵاتەکە و بەشێک لە کەناراوەکانی حودەیدیان کۆنترۆڵ کردووە، حکومەتی دانپێدانراویش بەشێکی زۆری باشووری یەمەنیان بەدەستەوەیە.

کاریگەریی ئاگربەستی نەتەوە یەکگرتووەکان لەسەر دۆخەکە

شەڕی نێوان ئەو دوو لایەنە تا ڕادەیەکی زۆر لە دوای ئاگربەستێک بە نێوەندگیریی نەتەوە یەکگرتووەکان لە ساڵی 2022 وەستا.

هەڕەشە نوێیەکانی حوسییەکان بۆ سەر فڕۆکەخانەکانی سعوودیە

بەڵام ڕۆژی هەینی حوسییەکان هەڕەشەی هێرشکردنە سەر فڕۆکەخانە و پێگە گرنگەکانی سەر بە سعوودیەیان کرد لە شاری عەدەن کە پشتیوانییەکی سەرەکیی حکومەتی یەمەنە، ئەوەش بەهۆی ئەوەی سعوودیەیان بەوە تۆمەتبار کرد هەوڵی داوە ڕێگری لە فڕۆکەیەکی ئێرانی بکات بنیشێتەوە.