ماوەی دوو ڕۆژە، هێزەکانی کۆماندۆی کوردستان لەگەڵ دژەتیرۆری عێراق بە بەشداریی هێزەکانی فەڕەنسا لە چوارچێوەی هاوپەیمانان، کێوماڵێکی ئەمنیی هاوبەشیان لە ناوچەی قەرەسالم لە سنووری کەرکووک دەستپێکردووە و لە ئۆپراسیۆنەکەدا ئەفسەرێک بە پلەی ملازمی یەک، لە هێزی دژەتیرۆری عێراق کوژرا.

ڕووبەڕووبوونەوە و کوژرانی ئەفسەرێک

لە کێوماڵەکەی ئەمڕۆدا، ژمارەیەک چەکداری داعش ڕووبەڕووی هێزەکانی ئۆپراسیۆنە هاوبەشەکەی، هێزەکانی کۆماندۆ و دژەتیرۆری عێراق بوونەتەوە و لە ئەنجامیشدا بەگوێرەی سەرۆکی دەزگای ڕووبەڕووبوونەوەی تیرۆری عێراق، ئەفسەرێک بەپلەی ملازمی یەک، لە هێزی دژەتیرۆری عێراق کوژراوە.

ئامانجی کێوماڵەکە

کەناڵ8 لەبارەی ئامانجی ئۆپراسیۆنەکە و جموجۆڵەکانی داعشەوە ڕایگەیاندووە، بەگوێرەی زانیارییەکانی کەناڵ8، کێوماڵەکە بە مەبەستی ڕووبەڕووبوونەوەی چەند شانەیەکی چەکدارانی داعشە و لەسەر بنەمای زانیاریی دروست بووە، کە داعش لە سنووری کەرکووک بەتایبەتی لە ناوچەکانی پردێ و دووبز جموجۆڵی کردووە.

گەمارۆدانی چەکدارانی داعش و بۆردوومانی ئاسمانی

هەر لە ئۆپراسیۆنەکەدا نیوەڕۆی ئەمڕۆ لە نزیک گوندی چیاچەرمۆک، شەڕ و ڕووبەڕووبوونەوە لەنێوان چەکدارانی داعش و هێزێکی هاوبەش دەستیپێکردووە و بە فڕۆکەی جەنگی بۆردوومانی چەکدارانی داعش لە سنووری شارەدێی پردێ دەکرێت و چەکدارانی داعش لە سنوورەکە گەمارۆدراون و دەگوترێت ژمارەیان 5 بۆ 6 چەکدارە.

پێگەی جوگرافیی ناوچەی قەرەسالم

ناوچەی قەرەسالم سەر بە قەزای دووبزە لە پارێزگای کەرکووک و لە باکوورەوە 20 کیلۆمەتر لە شارۆچکەی پردێوە دوورە.