قوباد تاڵەبانی، جێگری سەرۆکوەزیرانی هەرێمی کوردستان بەدواداچوونی بۆ بەڕێوەچوونی کارەکانی پڕۆژەکانی ئاوی گۆپتەپە – چەمچەماڵ و هێڵی 3ی ئاوی دووکان – سلێمانی کرد و بڕیاری پێویستی بۆ دابینکردنی بودجەی پڕۆژەکە دەرکرد.

بەدواداچوونی پڕۆژەکانی ئاو

قوباد تاڵەبانی، جێگری سەرۆکوەزیران لەگەڵ تیمی کۆمپانیای هابیکا کۆبووەوە و بە دواداچوونی بۆ چۆنییەتی بەرێوەچوونی کارەکانی هەر دوو پڕۆژەی گۆپتەپە – چەمچەماڵ و هێڵی 3ی ئاوی دووکان – سلێمانی کرد. لە کۆبوونەوەکەدا کە رۆژی یەکشەممە 5/7/2026 بەڕێوەچوو، جێگری سەرۆکوەزیران دوای لێکۆڵینەوە لە کێشە و گرفتەکان و چۆنییەتی بەڕێوەچوونی کارەکان، پاڵپشتی خۆی بۆ تەواوکردنی پڕۆژەکان دووپات کردەوە.

دابینکردنی بودجە بۆ کۆمپانیای جێبەجێکار

جێگری سەرۆکوەزیران لە کۆبوونەوەکەدا بڕیاری لەسەر دابینکردنی بەشێک لە بودجەی پڕۆژەکە بۆ کۆمپانیای جێبەجێکار دا و ڕایگەیاند کە بۆ ساڵی 2026 ئەم پڕۆژەیە لە ئەولەوییەتی کارەکانیاندایە و دەبێت لە وادەی دیاریکراوی خۆیدا جێبەجێ بکرێت. هەروەها دەستخۆشی لە کۆمپانیای جێبەجێکار کرد کە توانیویانە کارەکانی پڕۆژەی گۆپتەپە - چەمچەماڵ بەڕێوەببەن.

تێچوو و ماوەی جێبەجێکردنی پڕۆژەکە

پڕۆژەی ئاوی گۆپتەپە – چەمچەماڵ لە ساڵی 2024وە بە گوژمەی 139 ملیار دینار کەوتووەتە بواری جێبەجێکردنەوە و بڕیارە لە ماوەی 730 رۆژدا تەواو بکرێت.

گرنگی پڕۆژەکە بۆ ناوچەکە

بە تەواوبوونی پڕۆژەکە، کێشەی کەمئاوی لە قەزای چەمچەماڵ بە یەکجاری چارەسەر دەبێت. هاوکات پڕۆژەکە کەرتی کشتوکاڵ لە قەزاکە دەبووژێنێتەوە و نزیکەی 32 گوندی ناوچەکەش لە پڕۆژەی ئاوەکە سوودمەند دەبن.