سەرچاوەیەکى ئەمنى لە کەرکووک: سێ کەس لە ڕووبەڕووبوونەوەکەدا برینداربوون
لە کەرکووک ڕووبەڕووبوونەوە لە نێوان پاسەوانانى ئەحمەد ڕەمزی و پاسەوانانى نەخۆشخانەیەکى ئەهلى ڕوویدا و بەهۆیەوە سێ کارمەندى نەخۆشخانەکە برینداربوون.
هۆکاری ئاڵۆزییەکە
سەرچاوەیەکى ئەمنى لە کەرکووک بە کەناڵ8ى ڕاگەیاند، ڕووبەڕووبوونەوەکە کاتێک ڕوویداوە ئەحمەد ڕەمزی، کە ئەندامی ئەنجوومەن و سەرۆکی لیژنەی ئاسایش و بەرگری ئەنجوومەنی پارێزگای کەرکووکە، سەردانى نەخۆشخانەکەى کردووە و پاسەوانی نەخۆشخانەکە داواى کردووە پاسەوانەکانی ئەحمەد ڕەمزی بەدەمانچەوە نەچنە ناو نەخۆشخانەکە و بەم هۆیەوە شەڕ و ئاڵۆزییەکە دروستبووە.
برینداربوونی سێ کارمەندی کۆمپانیایەکی ئەمنی
بەگوێرەى سەرچاوەکە، لە ڕووبەڕووبوونەوەکەدا سێ کارمەندی ئەو کۆمپانیا ئەمنییەی ئەرکی پاراستنی نەخۆشخانە ئەهلییەکەیان لەئەستۆبووە بریندارن و ڕەوشی تەندرووستی یەکێکیان جێگیر نییە و لەنەخۆشخانەی کەرکووکی گشتی چارەسەر وەردەگرن.
هەردوولا سکاڵایان لە دژی یەکتری تۆمار کردووە
بەگوێرەى زانیارییەکانى کەناڵ8، هەردوولا سکاڵایان لەدژی یەکدی تۆمارکردووە و یەکێک لە پاسەوانەکانى ئەحمەد ڕەمزی ڕاگیراوە و لێکۆڵینەوە لە ڕووداوەکە دەستیپێکردووە.
2 کاتژمێر پێش ئێستا