پڕۆسەی دابەشکردنی هاوکارییە داراییەکانی هاوپەیمانان بۆ مانگی 5 دەستیپێکرد و سەرجەم ئەو پێشمەرگانە دەگرێتەوە کە لە میلاکی دیوان و یەکەکانی پیادەی وەزارەتدان.

دەستپێکردنی دابەشکردنی پارەکە

وەزارەتی پێشمەرگەی هەرێمی کوردستان ڕایگەیاند، ئەمڕۆ 6ـی تەممووز، دەست بە دابەشکردنی هاوکاریی دارایی مانگی ئایاری هێزەکانی هاوپەیمانان دەکرێت. پارەکە خراوەتە سەر هەژماری وەزارەت و ڕێکارە بانکییەکان بۆ گەیشتنی بە دەستی پێشمەرگەکان تەواو کراون.

سوودمەندان و بڕی هاوکارییەکە

ئەم هاوکارییە داراییە تایبەتە بە ئەفسەر و پێشمەرگەکانی دیوانی وەزارەت و تەواوی یەکەکانی پیادە. جێی ئاماژەیە لە سەرەتای شەڕی دژی داعش بڕی هاوکارییەکە 20 ملیۆن دۆلار بوو، بەڵام لە ئێستادا هاوکارییەکانی هاوپەیمانان بۆ 11 ملیۆن دۆلار کەمبووەتەوە و تاوەکو ساڵی 2026 بەردەوام دەبێت.

بەردەوامیی پاڵپشتیی هاوپەیمانان

بڕیارە ناردنی ئەم هاوکارییە داراییە تاوەکو مانگی ئەیلوولی ئەمساڵ بەردەوام بێت. سەرەڕای پارەکە، هاوپەیمانان بەردەوامن لە پێشکەشکردنی هاوکاریی لۆجستی، مەشق و ڕاهێنان و پڕچەککردنی ئەو لیوا هاوبەشانەی چوونەتە ژێر چەتری وەزارەتی پێشمەرگە.