سەرۆکوەزیرانی ئیسرائیل ئاشکرای دەکات، بەشێک لە دانیشتووانی گوندە کریستیان نشینەکانی باشووری لوبنان بۆ ڕزگاربوون لە دەست چەکدارانی حیزبوڵا، داوایان کردووە ناوچەکانیان بخرێتە سەر خاکی ئیسرائیل.

داواکاریی گوندەکانی باشووری لوبنان

بنیامین نەتانیاهوو، سەرۆکوەزیرانی ئیسرائیل لە میانەی بەشداریکردنی لە بەرنامەی "زە ساندەی بریفینگ"ـی کەناڵی فۆکس نیوزی ئەمریکی ڕایگەیاند، بەشێک لە گوند و شارۆچکەکانی باشووری لوبنان کە ئێستا لەژێر دەسەڵاتی سوپای ئیسرائیلدان، داوایان کردووە ببنە بەشێک لە ئیسرائیل. ئامانج لەم داواکارییەش پاراستنی ئەو ناوچانەیە لە هێرش و دەسەڵاتی چەکدارانی حیزبوڵا.

پاراستنی کریستیانەکان لە حیزبوڵا

نەتانیاهوو ئاماژەی بەوە کرد، ئەو گوندانە بە جدی داوای چوونە پاڵ ئیسرائیلیان کردووە، چونکە دەزانن سوپای ئیسرائیل دەیانپارێزێت. سەرۆکوەزیرانی ئیسرائیل گوتی: "ئێمە گرنگی بە هاوڕێکانمان دەدەین، بەتایبەتی کریستیانەکانی ڕۆژهەڵاتی ناوەڕاست. ئەو گوندە کریستیان نشینانەی لوبنان دەزانن ئێمە لە دەست ئەو توندڕەوانەی حیزبوڵا دەیانپارێزین کە دەیانەوێت بیانکوژن".

هەڵوێستی ئیسرائیل بەرامبەر ناوچەکە

سەرۆکوەزیرانی ئیسرائیل جەختی لەوە کردەوە کە وەک وڵاتەکەی، خۆیان بە بەرپرسیار دەزانن لە پاراستنی کریستیانەکان لە هەر شوێنێک بن. ئەم لێدوانانەی نەتانیاهوو لە کاتێکدایە کە سوپای ئیسرائیل لە چەند ناوچەیەکی باشووری لوبنان جێگیر بووە و ڕووبەڕووبوونەوەکان لەگەڵ حیزبوڵا لەو ناوچانە بەردەوامییان هەیە.