لە 14 کاتژمێردا؛ پێشمەرگەیەک مەودای نێوان کەرکووک و هەولێری بە ڕاکردن کۆتایی پێهێنا
پێشمەرگەیەک لە چالاکییەکی ناوازەدا توانیی مەودای نێوان هەردوو شاری کەرکووک و هەولێر بە ڕاکردن ببڕێت و پەیامێکی گرنگ ئاراستەی هێزەکانی پێشمەرگە بکات.
ماراسۆنێک لە کەرکووکەوە بۆ هەولێر
کارزان کامل جومعە، پێشمەرگەی فەوجی 2 سەر بە لیوای 2ـی پیادە، لە چالاکییەکی وەرزشیدا توانی مەودای نێوان شاری کەرکووک و هەولێر بە ڕاکردن ببڕێت. ناوبراو لەبەردەم پەیکەری پێشمەرگە لە کەرکووک دەستی بە ماراسۆنەکەی کرد و توانی بگاتە جەرگەی پایتەختی هەرێمی کوردستان.
14 کاتژمێر ڕاکردن
ئەم پێشمەرگەیە دوای بڕینی دەیان کیلۆمەتر و دوای 14 کاتژمێر ڕاکردنی بەردەوام، گەیشتە قەڵای مێژوویی هەولێر. کارزان بە ئیرادەیەکی پۆڵاینەوە توانی ئەم مەودا دوورەی نێوان هەردوو شارەکە بە پێ ببڕێت و سەرکەوتنی خۆی لەم ماراسۆنەدا ڕابگەیەنێت.
پەیامی پێشمەرگە بۆ وەرزش
کارزان کامل بە ڕاگەیاندنی وەزارەتی پێشمەرگەی گوت، وەک پێشمەرگەیەک ویستوویەتی ئەو پەیامە بگەیەنێت کە هێزی پێشمەرگە هەمیشە خاوەن ئیرادەیەکی پۆڵاینە. ئاماژەی بەوەش کرد، ئامانجی نیشاندانی ئەوە بووە کە پێشمەرگە لە هەموو کایەیەکدا، تەنانەت لە وەرزشیشدا، تەنها چاوی لە سەرکەوتن و پێشکەوتنی بەردەوامی گەلەکەیەتی.
2 کاتژمێر پێش ئێستا