سەدان هاونیشتمانیی کریستیان لە دهۆک دژی داگیرکردنی زەوییەکانیان گردبوونەوە و داوای جێبەجێکردنی بڕیارەکانی دادگا و گەڕاندنەوەی گوندەکانیان دەکەن.

گردبوونەوە لەبەردەم ئیدارەی پارێزگا

لەبەردەم ئیدارەی پارێزگای دهۆک، هاونیشتمانییانی کریستیان دژی داگیرکردنی زەوییەکانیان لەلایەن بەرپرسانی پارتی دیموکراتی کوردستانەوە گردبوونەوە. بەشداربووانی ناڕەزایەتییەکە نوێنەرایەتیی نزیکەی 50 گوندی کریستیانیان دەکرد کە دەکەونە سنووری شارۆچکەی ئاکرێ (دۆڵی نەهلێ)، ئامێدی (بەرواری باڵا)، ئیدارەی سەربەخۆی زاخۆ و دەشتی نەینەوا.

تۆمەتی داگیرکاری لەلایەن خزمانی بارزانی

بەشداربووانی گردبوونەوەکە ئاماژە بەوە دەکەن کە گوندەکانیان لەدوای ساڵانی 90ـەکانەوە داگیرکراون. هاونیشتمانییەکی کریستیان لەناو گردبوونەوەکەدا بە کەناڵ8ی ڕاگەیاند، گوندەکانیان لەلایەن خاڵەکانی مەسعود بارزانی، سەرۆکی پارتییەوە داگیرکراون. دەشڵێن، سەرەڕای ئەوەی فەرمانی دادگایان هەیە کە موڵکایەتیی گوندەکان بۆ ئەوان دەسەلمێنێت، بەڵام تاوەکو ئێستا زەوییەکانیان بۆ نەگەڕێندراوەتەوە.

ڕێگریی هێزە ئەمنییەکان لە بازگەکان

لە کاتی بەڕێوەچوونی ناڕەزایەتییەکەدا، ژمارەیەک هاونیشتمانیی کریستیان کە دەیانویست لە دەشتی نەینەواوە بچنە ناو شاری دهۆک بۆ بەشداریکردن لە گردبوونەوەکە، لەلایەن هێزە ئەمنییەکانەوە ڕێگرییان لێکرا. هێزە ئەمنییەکان لە بازگەی ئەلقووش - بەدریە ڕێگەیان بەو هاونیشتمانییانە نەداوە تێپەڕ بن و بچنە شوێنی مەبەست.