ساڵانە لە وەرزە گەرمەکاندا، حاڵەتەکانی سکچوون و ڕشانەوە زیاددەکەن، ئەمەش یەکێکە لە هۆکارەکانی وشکبوونەوە و ئەگەر بە دروستی مامەڵەی لەگەڵدا نەکرێت، مەترسی لەسەر ژیانی کەسە تووشبووەکە دروستدەکات.

گرنگە بزانرێت کە لەکاتی سکچوون و ڕشانەوەی زۆردا، تەنیا ئاو لە جەستە ناچێتە دەرەوە، بەڵکو کانزا و خوێیە گرنگەکانیش لەدەستدەدەین، هەربۆیە پێویستە ئێمە جێگەی ئەم خوێیانە بە گیراوەیەک بگرینەوە.

ORS ئەو گیراوەیەیە کە ئەو خوێ و شەکر و کانزایانەی تێدایە کە جەستە پێویستی پێیانە، ئەم گیراوەیە لە هەموو دەرمانخانەیەک دەستدەکەوێت و نرخێکی کەمی هەیە.

خۆ ئەگەر کاتێکی گونجاو نەبوو یان زۆر کتوپڕ تووشی وشکبوونەوە بوویت و نەتتوانی بچیتە دەرمانخانە و ئەم گیراوەیە بکڕیت، باشتر وایە خۆت لە ماڵەوە دروستی بکەیت.

چۆنێتیی دروستکردنی گیراوەی ORS لە ماڵەوە:

• لیترێک ئاو بکوڵێنە و چاوەڕێ بکە تاوەکو سارد دەبێتەوە
• شەش کەوچکی چا لە شەکر بکە ناو ئاوەکەوە
• پاشان نیو کەچکی چا خوێی تێبکە
• پاش هەموو توالێتێک گرنگە پەرداخێک بۆ دوو پەرداخ لەم گیراوەیە بخۆیتەوە
• پێویستە پاش 24 کاتژمێر لە دروستکردنی، ئەگەر مابووەوە فڕێی بدەیت و گیراوەیەکی نوێ دروست بکەیت
• نابێت شەکری زیاتری تێبکەیت، چونکە سکچوونەکە خراپتر دەکات، ناشبێت خوێی زیاتری تێبکەیت، چونکە زیان بە ئەندامەکان دەگەیەنێت، هەر لەبەر ئەم هۆکارەشە نابێت لەگەڵ هیچ شەربەت و خواردنەوەیەکی دیکە تێکەڵ بکرێت

گرنگە بزانرێت کە ئەو گیراوەیەی لە دەرمانخانەکاندا هەن، کاریگەرتر و وردتر کاردەکەن بەراورد بەو گیراوەیەی لە ماڵەوە دروست دەکرێت، هەربۆیە دەتوانیت تەنیا لە کاتە کتوپڕەکاندا خۆت دروستی بکەیت.