شەپۆلێکی گەرمای مێژوویی وڵاتانی ئەورووپای گرتووەتەوە، بەهۆیەوە بە هەزاران کەس گیانیان لەدەستداوە و ئۆپراسیۆنەکانی چۆڵکردنی چەند ناوچەیەکی دیاریکراویش بەردەوامە.

هۆکارەکانی زوو دەستپێکردنی ئاگرکەوتنەوە

بەگوێرەی ئاماژەکانی پەیوەست بە کەشوهەوا بێت، وەرزی ئاگرکەوتنەوەی دارستانەکان زوو لەم وڵاتانە دەستپێدەکات، هۆکارەکەشی بۆ بەرزبوونەوەی پلەکانی گەرما، وشکی و بای بەهێز دەگەڕێتەوە.

هەوڵەکان بۆ کۆنترۆڵکردنی ئاگر لە باشووری فەڕەنسا

لە فەڕەنسا، تیمەکانی ئاگرکوژێنەوە ئێستا لە هەوڵدان بۆ کۆنترۆڵکردنی ئەو ئاگرەی دارستانەکانی باشووری وڵاتەکەی گرتووەتەوە، بای بەهێز و پلەی گەرما وایکردووە ئاگرەکە لە هەرێمی بیرنییە زیاتر بڵاوبێتەوە. بەو هۆیەوە چەند کۆگایەک و یەختێک لە بەندەرێکی نزیک سنووری ئیسپانیا ئاگریان گرتووە و دووکەڵی چڕ بەسەر کەناراوەکاندا بەرزبووەتەوە.

بەرزبوونەوەی ژمارەی ئاوارەبووان

سەرەتا دەسەڵاتدارانی ناوچەکە نزیکەی 1500 کەسیان لەو ناوچانە دوورخستەوە، دواتر ژمارەکە بۆ نزیکەی 3000 کەس بەرزبووەوە و فڕۆکە و هێلیکۆپتەریش بۆ کوژانەوەی ئاگرەکە بەکارهاتن.

هۆشدارییەکانی سەرۆکوەزیرانی فەڕەنسا

سباستیان لوکۆرنۆ، سەرۆکوەزیرانی فەڕەنسا سەبارەت بە هۆکاری سەرهەڵدانی ئاگرەکان ڕایگەیاند، دیاردەکانی گۆڕانکاری کەش وایکردووە ئەم ئاگرانە دروست بن لە کاتێکدا کە زووترە بەبەراورد بە ساڵانی ڕابردوو، لە سەرەتای وەرزەکەش تاوەکو ئێستا لە فەڕەنسا 7000 ئاگر ڕوویداوە.

تۆمارکردنی گەرمترین مانگی حوزەیران لە مێژوودا

دەستەی کەشناسی فەڕەنسا لەبارەی ئامارە پێوانەیییەکانی گەرماوە دەڵێت، مانگی حوزەیرانی 2026 گەرمترین مانگ بووە لەو کاتەوەی ئامارەکانی کەشوهەوا لە ساڵی 1947وە تۆمار دەکرێت.

تێپەڕاندنی ئاستی پێوانەیی پلەکانی گەرما

پلەکانی گەرما لە مانگی حوزەیران تۆماری ساڵەکانی 2003 و 2025ی تێپەڕاند، پلەکانی گەرماش 40 پلەی سیلیزییان لە بەشێکی زۆری وڵاتەکە تێپەڕاند.

ڕاگەیاندنی هۆشداریی توند لە دەیان ناوچەی جیاواز

لە 72 ناوچەی فەڕەنسا هۆشداریی توند درا لەو شەپۆلە گەرمایەی دروستبووە و ئەمەش لەو کاتەوەی سیستمی ئاگادارکردنەوە لە ساڵی 2004 دانراوە تۆمار نەکراوە.

باری نائاسایی لە پورتوگال و داوای هاوکاریی نێودەوڵەتی

لە پورتوگالیش حاڵەتی لەناکاو ڕاگەیەندراوە و داوای پاڵپشتی لە یەکێتی ئەورووپا، ئیسپانیا و مەغریب کراوە تاوەکو هاریکاری ئەو وڵاتە بکەن لە کوژانەوەی ئاگری دارستانەکان.

ئاماری زیانەکان و بەشداریی تیمەکانی ئاگرکوژێنەوە

زیاتر لە 2800 کارمەندی ئاگرکوژێنەوە لە پرۆسەکە بەشدارن بۆ کوژانەوەی شەش ئاگری دارستانەکان، زیاتر لە 13000 هێکتار سەوزاییش تا ئێستا لە وڵاتەکە سووتاون.

بڵاوبوونەوەی ئاگر لە ناوچەی کوستا براڤای ئیسپانیا

لە ئیسپانیاش لە نزیک ناوچەی کوستا براڤا ئاگر کەوتووەتەوە و نزیکەی 400 کارمەندی فریاگوزاری بەشدارن لە پرۆسەی کوژانەوەی ئاگرەکە.

ئیسپانیا؛ ناوەندی سەرەکیی گۆڕانکارییەکانی کەشوهەوا لە ئەورووپا

زۆرترین گۆڕانکارییەکانی کەشوهەوا لەنێو وڵاتانی ئەورووپا لە ئیسپانیا ڕوویداوە، هاوینی ڕابردوو خراپترین ئاگر لە مێژووی ئەو وڵاتە ڕوویدا و 393000 هێکتار زەوی سووتان، بەهۆیەوە 8 کەس گیانیان لەدەستدا و 42000 کەسیش ئاوارە بوون.