پارێزگاری هەولێر ڕایگەیاند پڕۆسەی دابەشکردنی زەوی بەردەوام دەبێت و تاوەکو ئێستا 60%ی ئەو فەرمانبەرانەی ناویان گەڕاوەتەوە لە سنووری پارێزگاکەیان زەوییان وەرگرتووە.

بەردەوامیی دابەشکردنی زەوی لە سنووری هەولێر

ئومێد خۆشناو، پارێزگاری هەولێر لە ڕێوڕەسمی دابەشکردنی 3,000 پارچە زەوی لە شارۆچکەی خەبات ڕایگەیاند، لە سنووری ئەوان زۆرترین زەوی دابەشکراوە و ڕێژەی دابەشکردنەکە گەیشتووەتە 60%ی ئەو فەرمانبەرانەی ناویان پەسەندکراوە. جەختیشی کردەوە کە دابەشکردنی زەوی بەردەوام دەبێت تاوەکو ئەو کاتەی کۆتا فەرمانبەر کە ڕەزامەندی وەرگرتنی هەیە، پارچە زەوییەکەی پێدەگات.

بەرزبوونەوەی نرخی زەوییەکان دوای تاپۆکردن

پارێزگاری هەولێر ئاماژەی بەوە کرد ئەو زەوییانەی ئێستا دابەش دەکرێن لە سەرەتادا بە شێوەی "کارت"ن، بەڵام کار دەکرێت بۆ ئەوەی سەرجەمیان بکرێن بە تاپۆ. ڕوونیشیکردەوە کە بە تاپۆکردنی زەوییەکان نرخەکانیان بە شێوەیەکی بەرچاو بەرز دەبێتەوە، هەر بۆیە داوای لە فەرمانبەران کرد زەوییەکانیان بە پەلە و بە نرخێکی هەرزان نەفرۆشن.

مەترسییەکانی مامەڵەکردن بە کارتی زەوی

ئومێد خۆشناو هۆشداری دا لەوەی کڕین و فرۆشتنی کارتی زەوی کێشەی زۆری لێدەکەوێتەوە و لە ساڵانی ڕابردوودا بەهۆی مامەڵەکردن بە کارتەوە چەندین کێشەی کۆمەڵایەتی دروستبوون. باسی لەوەشکرد یەکێک لە کێشە سەرەکییەکان ئەوە بووە کە یەک کارتی زەوی بە چەند کەسێک فرۆشراوە و لە کاتی تاپۆکردندا دەرکەوتووە چەند خاوەنێکی هەیە.

چارەسەرکردنی کێشەی زەوییە کارتەکان

بۆ کۆتاییهێنان بە کێشەکانی تایبەت بە زەوییە کارتەکان لە سنووری پارێزگای هەولێر، حکومەت لە ماوەی ڕابردوودا نزیکەی 100,000 پارچە زەوی کە بە کارت بوون گۆڕیویەتی بۆ تاپۆ، ئەمەش وەک هەنگاوێک بۆ پاراستنی مافی هاووڵاتییان و ڕێگریکردن لەو فێڵ و کێشانەی لە کاتی کڕین و فرۆشتندا ڕوودەدەن.