شاسوار عەبدولواحید، سەرۆکی جووڵانەوەی نەوەی نوێ ڕایگەیاند، لە دادگای فیدراڵی سکاڵایان لەسەر حکومەتی هەرێمی کوردستان تۆمارکردووە بۆ هەڵوەشاندنەوەی سەرجەم بڕیارەکانی سێ ساڵی ڕابردووی، هاوکات داوای هەڵوەشاندنەوەی پەرلەمان و سنووردارکردنی پۆستەکانی پارتی دیموکراتی کوردستانی کرد لە کابینەی نوێدا.

سکاڵا لە دادگای فیدراڵی

شاسوار عەبدولواحید، سەرۆکی جووڵانەوەی نەوەی نوێ لە کۆنفرانسێکی ڕۆژنامەوانیدا گوتی، لە دادگای فیدراڵی سکاڵامان لەسەر حکومەتی هەرێمی کوردستان تۆمارکرد و دەبێت بڕیارەکانی سێ ساڵی ڕابردووی حکومەتی هەرێمی کوردستان هەڵبوەشێنرێنەوە.

هەڵوێست بەرامبەر پەرلەمان و نرخی خزمەتگوزارییەکان

سەرۆکی جووڵانەوەی نەوەی نوێ لەبارەی هەڵوەشاندنەوەی پەرلەمان و نرخەکانی خزمەتگوزارییەوە گوتی، لەگەڵ هەڵوەشاندنەوەی پەرلەمانی کوردستانداین و دەبێت بڕیارەکانی گرانکردنی کارەبا و خزمەتگوزارییەکان هەڵبوەشێنرێنەوە.

داوای هەڵوەشاندنەوەی بڕیارەکانی حکومەت

شاسوار عەبدولواحید لە بەشێکی دیکەی کۆنفرانسە ڕۆژنامەوانییەکەیدا لەبارەی بڕیارەکانی حکومەتی هەرێمی کوردستانەوە باسی ئەوەی کرد، لە 10ـی تەممووزی 2023ـەوە ئەم حکومەتە هەر بڕیارێکی دابێت دەبێت هەڵبوەشێتەوە و ئەم حکومەتە لە 2023ـەوە وادەی یاسایی بەسەرچووە.

پشکی پارتی و دابەشکاریی پۆستە باڵاکان

سەرۆکی جووڵانەوەی نەوەی نوێ لەبارەی بردنی پۆستەکانی حکومەت لەلایەن پارتی دیموکراتی کوردستانەوە ڕاشیگەیاند، "پارتی بۆی نییە هەموو پۆستەکان بۆ خۆی ببات و ئەو سەردەمە گوزەشت کە پارتی هەموو پۆستەکان بۆ خۆی ببات و پارتی دەبێت نیوە یان نیوە کەمتری پۆستەکانی هەبێت و پارتی دەبێت سەرۆکی هەرێمی کوردستان یان سەرۆکوەزیرانی هەبێت".