بنیامین نەتانیاهوو، سەرۆکوەزیرانی ئیسرائیل، ڕایگەیاند، هێشتا جەنگ کۆتایی نەهاتووە و ئامادەن بۆ هەموو سیناریۆکان، هاوکات یسرائیل کاتز، وەزیری بەرگریی وڵاتەکە ئامادەباشیی سوپای ڕاگەیاند بۆ دەستپێکردنەوەی هێرشەکان بۆ سەر ئێران.

نەتانیاهوو: هەمیشە لە دوژمنەکەمان بەهێزترین

نەتانیاهوو، لە میانی بەشداریکردنى لە ڕێوڕەسمی دەرچووانی سەربازی لە باشووری ئیسرائیل ڕایگەیاند، ئەوان بۆ هەموو سیناریۆکان ئامادەن و هەمیشە لە دوژمنەکانیان بەهێزترن.

350 ملیار شیکڵ بۆ بودجەى بەرگرى

سەرۆکوەزیرانی ئیسرائیل جەختی لەوە کردەوە، وڵاتەکەی سیاسەتی سەربەخۆیی چەکداری بەرەوپێش دەبات و حکومەتەکەی 350 ملیار شیکل کە دەکاتە 115 ملیار دۆلار، بۆ بودجەی بەرگری زیاد دەکات لە دەیەی داهاتوودا.

گوتیشی، پەرە بە پیشەسازیی بەرفراوانی چەک دەدەن و ئەمەش وابەستەیی و پشتبەستنیان بە دەرەوە کەمدەکاتەوە.

ئامادەیی بۆ دەستپێکردنەوەى شەڕ

لە هەمان ڕێوڕەسمدا، یسرائیل کاتز، وەزیری بەرگریی ئیسرائیل ڕایگەیاند، سوپاکەیان لە ئامادەباشیدایە بۆ دەستپێکردنەوەی هێرشەکان بۆ سەر ئێران و جێگیرکردنەوەی باڵادەستیی ئاسمانی، بە مەبەستی لەناوبردنی هەڕەشەکان.

کاتز: سوپاى ئیسرائیل دەستى دەگات بەهەموو شوێنێک

کاتز گوتی: "لە سەرەتای ئۆپەراسیۆنی نەڕەی شێردا، خامنەیی باوکیان لەناوبردووە و خامنەیی کوڕیشیان بە سەختی بریندار کردووە"، بە گوتەی ئەو ئەمەش بەڵگەیە بۆ ئەوەی کە سوپای ئیسرائیل دەستی دەگات بە هەر شوێنێک کە لەوێوە هەڕەشە بکرێتە سەر ئیسرائیل.