جۆزیف عەون، سەرۆکی لوبنان ڕایگەیاند، دەیانەوێت دۆسیەی وڵاتەکەیان لەسەر مێزی گرنگی پێدانی ئەمریکا بێت و پێگەی خۆی بەهێز بکات.

فریادڕەسى لوبنان ئەمریکایە بۆ فشار لەسەر ئیسرائیل

عەون لە کۆنفڕانسێکی ڕۆژنامەوانیدا گوتی، ئەمریکا تاکە لایەنە بتوانێت فشار لە ئێسرائیل بکات زاحییەی باشووری بەیروت نەکاتە ئامانج و داگیرکاریی فراوانتر نەکات لە باشوورەوە، بۆیە لوبنان پێویستی بە پشتیوانیی ئەمریکایە بۆ گەڕانەوەی تەواوی خاکەکەی.

سەروەرى لوبنان جێگەى سازش نییە

عەون جەختیلەوە کردەوە، سەروەریی لوبنان جێگەی هیچ سازش و هەوڵدانێک نییە، دەوڵەت دەیەوێت تەواوی خاکەکەی بگەڕێتەوە ژێر دەسەڵاتی سوپا و دامەزراوە شەرعییەکان، ئەوەی داوای دەکەین مافێکی سروشتییە.

دانوستان بەباش زانراوە

سەرۆکی لوبنان باسیلەوەشکرد، وڵاتەکەی لە دۆخێکدا نەبووە بەهۆی فراوانبوونی جەنگ و ناوچە داگیرکراوەکان بژاردەی زیاتر بسەپێنێت، بۆیە دانوستانی ڕاستەوخۆ باشترین چارەسەر بوو بۆ کورتکردنەوەی کاتیی داگیرکارییەکان و گەڕاندنەوەی ئاوارەکان.

سەروەرى لوبنان و بڕیارەکان لەبارەیەوە

عەون گوتیشی، دەوڵەت بەرپرسیاری هەموو بستێک خاکی لوبنان و هاوڵاتییەکانیەتى، پێویستە بڕیارەکانی لوبنان لەناو دامەزراوە شەرعییەکانەوە بدریت و هیچ لایەنێک بۆی نییە بەناوی لوبنانەوە دانوستان بکات.

کۆبوونەوەى عەون و نەتانیاهوو لە کۆشکى سپى

سەرۆکی لوبنان بە دووری دەزانێت لە کۆشکی سپی لەگەڵ سەرۆکوەزیرانی ئیسرائیل کۆببێتەوە، بەڵام جەختی لەوەکردەوە، نووسینگەی سەرۆکایەتیی لوبنان بۆ هەمووان کراوەیە.