پەرلەمانتارێکی یەکێتیی نیشتمانیی کوردستان ئاشکرای دەکات کە بەهۆی نەفرۆشتنی نەوتەوە عێراق لە دۆخێکی دارایی دژواردایە، بۆ ئەم مەبەستەش وەزارەتی دارایی شەش پڕۆژەیاسای بە ئامانجی فرەسەرچاوەکردنی داهات و دانەوەی قەرزەکان پێشکەشی پەرلەمان کردووە و شێوازی بودجەی ساڵی داهاتووش دەگۆڕدرێت بۆ شێوازی بەرنامە.

کەمبوونەوەی داهاتی عێراق و کۆبووەنەوەی لیژنەی دارایی

دیلان غەفور، پەرلەمانتار لە فراکسیۆنی یەکێتی ڕایگەیاند، عێراق لە دۆخێکی دارایی دژواردایە و داهات تەواو کەمبووەتەوە، ئاماژەی بەوە کرد، لە سەردانی هەفتەی ڕابردووی وەزیری دارایی بۆ لیژنەی دارایی ئەنجوومەنی نوێنەران بە وردی باسی دۆخی ئابووری و کەمبوونەوەی داهات و هەنگاوەکانی حکومەتی کرد لە پێناو زیادکردنی داهات.

قەیرانی دارایی و پشتیوانیی پەرلەمان لە حکومەت

دیلان غەفور لەبارەی گرفتەکانی بەردەم سەرچاوەی سەرەکیی داهاتی عێراقەوە ڕایگەیاند، بەهۆی نەفرۆشتنی نەوت و داخرانی گەرووی هوورمز، سەرچاوەی سەرەکیی داهاتی وڵات کە فرۆشتنی نەوتە تووشی گرفت بووە، حکومەت کاردەکات بۆ فرەسەرچاوەکردنی داهات و ئەوانیش لە پەرلەمانەوە پشتیوانیی دەکەن.

شەش پڕۆژەیاسا بۆ کەمکردنەوەی فشاری سەر مووچە

بە گوتەی دیلان غەفور، وەزارەتی دارایی شەش پڕۆژەیاسای ئامادەکردووە و ڕادەستی لیژنەی دارایی کردوون کە ئامانج لێیان زیادکردنی داهاتە لە ڕێی چاکسازیی وەبەرهێنان، بەکارهێنانی زەوی کشتوکاڵی، فرۆشتنی موڵکەکانی وەزارەتی دارایی، مۆڵەتی فەرمانبەران و گواستنەوەیان بۆ کەرتی تایبەت لە پێناو کەمکردنەوەی فشارەکانی سەر پارەی مووچە.

بژاردەی فرۆشتنی موڵکەکانی دەوڵەت

ئەو پەرلەمانتارە باسی لەوەش کرد، حکومەتی عێراق قەرزێکی زۆری ناوخۆیی و دەرەکیی لەسەرە و بەدوای ڕێگەچارەی گونجاودا دەگەڕێت بۆ دانەوەی قەرزەکان، یەکێک لەوانەش فرۆشتنی موڵک و ماڵی دەوڵەتە.

گۆڕانکاری لە پڕۆژەیاسای بودجەی ساڵی داهاتوودا

دیلان غەفور لەبارەی پڕۆژەیاسای بودجەوە گوتی "حکومەت کاری لەسەر دەکات و بۆ ساڵی داهاتوو یاسای بودجەی دەبێت و بودجە لە شێوازی بەندەوە دەگۆڕێت بۆ بەرنامە، ئەم شێوازی بودجەیەش لە وەزارەتەکاندا سەرەتا لە وەزارەتی کارەبا جێبەجێ دەکرێت و لە پارێزگاکانیش لە سەلاحەدین و دیوانیە جێبەجێ دەکرێت".