حکومەتی عێراق لە دەیەمین کۆبوونەوەی خۆیدا زنجیرەیەک بڕیاری بۆ ڕێکخستنەوەی کارە کارگێڕییەکان دەرکرد و تێیدا دەسەڵاتی بڕیاردانی لە ئەنجوومەنە وزارییەکان وەرگرتەوە.

سنووردارکردنی دەسەڵاتی ئەنجوومەنە وزارییەکان

ئێوارەی ڕۆژی شەممە، دەیەمین کۆبوونەوەی ئەنجوومەنی وەزیرانی عێراق بە سەرۆکایەتیی عەلی زەیدی، سەرۆکوەزیران بەڕێوەچوو. لە کۆبوونەوەکەدا بڕیاردرا بە مەبەستی ڕێکخستنی کارەکانی حکومەت، دەسەڵاتی سەرجەم ئەنجوومەنە وزارییەکان سنووردار بکرێت. بەپێی بڕیارەکە، دەسەڵاتی ئەم ئەنجوومەنانە کەمکرایەوە بۆ ئاستی پێشکەشکردنی ڕاسپاردە بۆ ئەنجوومەنی وەزیران و چیتر ناتوانن بە شێوەیەکی سەربەخۆ بڕیار بدەن.

پەسەندکردنی پلانی کشتوکاڵیی 2026

لە بەشێکی دیکەی کۆبوونەوەکەدا، ئەنجوومەنی وەزیران پلانی کشتوکاڵی هاوینی بۆ وەرزی 2026 پەسەند کرد. ئەم پلانە سەرجەم پارێزگاکانی عێراق دەگرێتەوە، جگە لە پارێزگاکانی هەرێمی کوردستان. ئەم هەنگاوە لە چوارچێوەی هەوڵەکانی حکومەتدایە بۆ ڕێکخستنەوەی کەرتی کشتوکاڵ و دابینکردنی پێداویستییەکانی جووتیاران بۆ وەرزی داهاتوو.

گۆڕانکاری لە پۆستە کارگێڕی و تەندروستییەکان

ئەنجوومەنی وەزیران دەنگیدا لەسەر پەسەندکردنی ئاڵوگۆڕی ژمارەیەک لە بەڕێوەبەری فەرمانگە تەندروستییەکان لە پارێزگاکان. هەروەها دەسەڵاتی تەواو بە سەرۆکوەزیران درا کە بتوانێت بە خول، گواستنەوە و گۆڕین، بەڕێوەبەرە گشتییەکان و پلە هاوتاکانیان لە سەرجەم دامودەزگاکانی حکومەتدا دەستنیشان بکات، ئەمەش لەسەر پێشنیازی وەزیرەکان یان سەرۆکی ئەو فەرمانگانەی پەیوەست نین بە وەزارەتەکانەوە.

ڕەتکردنەوەی پڕۆژەی وەبەرهێنان و ئاوەدانکردنەوە

لە چوارچێوەی چاکسازیی دارایی و کارگێڕیدا، ئەنجوومەنی وەزیران پێدانی مۆڵەتی وەبەرهێنانی بۆ پڕۆژەی نیشتەجێبوونی "بیسان" لە پارێزگای نەینەوا ڕەتکردەوە. هەروەها بڕیاردرا بەدواداچوون بۆ ئەگەری گواستنەوەی خاوەندارێتیی زەوییەکە بۆ سەر وەزارەتی دارایی بکرێت. هاوکات، ڕەزامەندی درا لەسەر لێخۆشبوونی پڕۆژەکانی ئاوەدانکردنەوەی چەند مەزارگەیەکی ئایینی لە پارێزگاکانی نەجەف، کەربەلا و دیالە.