​ گەورەبوونی دڵ واتە دڵ لە قەبارەی ئاسایی گەورەتر بێت، ئەم حاڵەتە نەخۆشی نییە، بەڵکو نیشانەی بوونی گرفتێکی تەندروستیی دیکەیە کە دڵ ناچار دەکات بەراورد بە پێشوو بەهێزتر کار بکات.

​گرنگترین هۆکارەکانی تووشبوون بە حاڵەتی گەورەبوونی دڵ چین؟

هۆکارەکانی تووشبوون بە حاڵەتی گەورەبوونی دڵ بریتین لە:

1. بەرزبوونی فشاری خوێن: هۆکاری سەرەکیی تووشبوونە بە گرفتی گەورەبوونی دڵ،  دڵ ناچار دەبێت بە هێزتر خوێن بنێرێت بۆ ئەندامەکانی دیکەی جەستە،  بۆیە ماسولکەی دڵ گەورە دەبێت
2. نەخۆشییەکانی دەمەوانەی دڵ: ئەگەر دەمەوانەکانی دڵ باش دانەخرێن یان تەنک ببن، خوێن بە ئاسانی ناڕوات و دڵ زیادە کار دەکات
3. لاوازیی ماسولکەی دڵ: دڵ فراوان دەبێت و هێزی ناردنی خوێنی بۆ ئەندامەکانی دیکەی جەستە کەم دەبێت
4. نەخۆشیی بۆرییە خوێنەکانی ناو دڵ: دوای جەڵتەی دڵ یان کەمیی خوێنگەیشتن بە ماسولکەکانی دڵ، دڵ دەگۆڕێت و گەورە دەبێت
5. کێشەی زگماکی دڵ: هەندێک کەس لەکاتی  لەدایکبوونەوە گرفتیان لە دڵیاندا هەیە کە دەبێتەهۆی گەورەبوونی دڵیان
6. ناڕێکیی لێدانی دڵ: لێدانێکی زۆر خێرای دڵ دەبێتەهۆی گەورەبوونی دڵ
7. نەخۆشییەکانی سییەکان: وەک بەرزەفشاری بۆری سییەکان  کە بەشی ڕاستی دڵ گەورەتر دەکات
8. کەمیی خوێن:  دڵ ناچار دەبێت خێراتر کار بکات بۆ گەیاندنی ئۆکسجین بە ئەندامەکانی دیکەی جەستە
9. نەخۆشیی ڕژێنی دەرەقی( پەریزاد)

هەندێک هۆکاری دیکەی  وەکو:

1. قەڵەوی
2. شەکرە
3. خواردنەوەی کحول بە زۆری
4. هەندێک ماددەی هۆشبەر

​نیشانەکانی تووشبوون بە گرفتی گەورەبوونی دڵ چین؟

باوترین نیشانەکانی تووشبوون بە گرفتی گەورەبوونی دڵ بریتین لە:

1. هەناسەتووندی
2. ماندووبوون
3. خێرابوونی لێدانی دڵ
4. ئاوسانی قاچ
5. ئازاری سنگ

​چۆن گرفتی گەورەبوونی دڵ دەستنیشان دەکرێت؟

لە ڕێگەی ئەنجامدانی ئەم پشکنینانەوە گرفتی گەورەبوونی دڵ دەستنیشان دەکرێت:

1. ئیکۆی دڵ
2. هێڵکاری دڵ

​ئایا گرفتی گەورەبوونی دڵ مەترسیدارە؟

بەڵێ، ئەگەر گرفتی گەورەبوونی دڵ چارەسەر نەکرێت دەکرێت بێتەهۆی:

1. پەککەوتنی دڵ
2. جەڵتەی دڵ
3. جەڵتەی مێشک
4. مردنی کتوپڕ

د. ئەمانج ئەبوبەکر خەزنەدار

پزیشکی پسپۆڕی نەخۆشییە هەناوییەکان