کچێکی تەمەن سێ ساڵان لە کەرکووک کوژرا، دوو کوڕی نەوجەوانیش بەتۆمەتی کوشتنی ئەو منداڵە دەستگیرکراون، کە تەمەنیان 10 ساڵان و 11 ساڵانن، لەناو باڵەخانەیەکی کۆندا پاش ئەوەی خستوویانەتە نێو ئاوێکەوە، کچەکە خنکاوە.

ڕووداوەکە لە زاری پۆلیسەوە بۆ کەناڵ8

عامر شوانی، گوتەبێژی پۆلیسی کەرکووک وردەکاریی ڕووداوەکەی بۆ کەناڵ8 ڕوونکردەوە و دەڵێت، ماڵی کچە کوژراوەکە لەگەڵ ماڵی ئەو دوو کوڕەی بەتۆمەتی کوشتنی دەستگیرکراون، پێکەوە لە گەڕەکی یەکی حوزەیرانی کەرکووک دراوسێن، کچەکە هاوڕێی دوو نەوجەوانەکە بووە کە تەمەنیان 10 ساڵان و 11 ساڵانە، ڕۆژی ڕووداوەکە لە ماڵیان بووە، پاشان لە ماڵ هاتوونەتە دەرەوە، بەمەبەستی گەڕاندنەوەی کچەکە بۆ ماڵی خۆیان.

"خستوویانەتە ناو ئاوەوە و خنکاوە"

عامر شوانی ئاماژەی بەوەشکرد، بەگوێرەی ئەو دیمەنانەی لە کامێرای چاودێرییەوە دەرکەتووە، دوو نەوجەوانەکە کچەکەیان بردووەتە باڵەخانەیەکی چۆڵ کە پێیدەڵێن سەنتەری گەنجان، کچەکە دەستی کردووە بە گریان و دوو نەوجەوانە کوڕەکەش ترساون، ئاوێک لەناو باڵەخانەکەدا هەبووە، هەڵیانداوەتە ناو ئاوەکە و خنکاوە.

پۆلیسی کەرکوک لێکۆڵینەوەی زیاتر لە ڕووداوەکە دەکات

گوتەبێژی پۆلیسی کەرکوک ڕوونیشیکردەوە، ئەو دەنگۆیانەی باس لەوە دەکەن کە دەستدرێژی کراوەتە سەر کچەکە، هێشتا یەکلا نەبووەتەوە و لە ئێستادا پزیشکی دادی کەرکوک دەستی بە لێکۆڵینەوە سەرەتاییەکان کردووە و دواتر هەر زانیارییەکی دیکە لەم بارەیەوە هەبوو، بۆ ڕای گشتی بڵاودەکەنەوە.