وەزارەتی کشتوکاڵی هەرێمی کوردستان، تاتوێی جێبەجێکردنی بڕیاری 172ـی ئەنجوومەنی وەزیرانی کرد کە جەختدەکاتەوە نابێت، ڕێژەى کرێکارى خۆماڵى لە پڕۆژەکان لە %75 کەمتر بێت.

کۆبوونەوەیەکی باڵا لە دیوانی وەزارەتی کشتوکاڵ

وەزارەتی کشتوکاڵ و سەرچاوەکانی ئاو بڵاویکردەوە، دیوانی وەزارەتەکەیان بە ئامادەبوونی ڕاوێژکاران و بەڕێوەبەرانی گشتیی لایەنەکانی نوێنەرانی وەزارەتەکانی کار و کاروباری کۆمەڵایەتی، بازرگانی و پیشەسازی فەرمانگەی هەماهەنگی بەدواداچوون کۆبووەوە.

ئامانجی کۆبوونەوەکە دەستبەسەرکردنی مافی کرێکارانە

دەشڵێت، ئامانجی کۆبوونەوەکە تیشک خستنەسەر جێبەجێکردنی یاسای کار لە بڕیاری ژمارە 172ی ئەنجومەنی وەزیران بوو، بۆ دەستەبەرکردنی مافی کرێکاران و سەرپەرشتیاری پڕۆژە کشتوکاڵییەکان و ڕەخساندنی دەرفەتی کار بۆ هێزی کاری ناوخۆیی.

دروستکردنی داتابەیسێکی تایبەت بە پڕۆژە کشتوکاڵییەکان

بە گوێرەی ڕاگەیێنراوەکە، لە ​کۆبوونەوەکەدا، گفتوگۆیان لەسەر هەنگاوە تەکنەلۆجییەکان بۆ بەرەو پێشبردنی کەرتی کشتوکاڵی و دروستکردنی ژمارەی دیجیتاڵی (UEN) بۆ کۆمپانیا کشتوکاڵییەکان و ناوی بازرگانی (UPN) بۆ پڕۆژەکان کرد، بڕیاری دروستکردنی داتابەیسێکی تایبەت بە پڕۆژە کشتوکاڵییەکان بۆ سەرژمێریکردنی سەرجەم کرێکارە ناوخۆییەکان و گرەنتی ڕێکارەکانی دەستەبەرکردنی مافەکان و دابینکردنی ژینگەیەکی گونجاو بۆ کارکردن ڕەخساندنی دەرفەتی کار لەم کەرتەدا درا.

بڕیارى ژمارە (172)ـی ئەنجوومەنى وەزیرانى حکومەتى هەرێمى کوردستان، بۆ گرنگیدان بە تواناکانى گەنجانى خۆمان و ڕەخساندنى هەلى کارى زیاتر بۆ کرێکارى ناوخۆ دراوە کە بەگوێرەی بڕیارەکە، "نابێت لە پرۆژەیەکدا ڕێژەى کرێکارى خۆماڵى لە %75 کەمتر بێت".