عەلی زەیدی، سەرۆکوەزیرانی عێراق لە واشنتنە و ناوەندێکی توێژینەوەش وردەکاریی ئەو دۆسیە ئابوورییە گرنگانە ئاشکرا دەکات کە لەم سەردانەدا لەگەڵ بەرپرسانی ئەمریکا یەکلایی دەکرێنەوە.

دیدگایەکی نوێ بۆ کەرتی وزە و نەوت

بەگوێرەی زانیارییەکانی ناوەندی بەیان بۆ توێژینەوە و پلاندانان، یەکێک لە سەرەکیترین دۆسیەکانی شاندی عێراق، گەیشتنە بە ڕێککەوتنێکی هاوبەش لەگەڵ ئەمریکا بۆ داڕشتنی پلانێکی گشتگیر لە بوارەکانی گواستنەوە و پاڵاوتنی نەوت و گاز. ئەم پلانە تەنیا لەسەر زیادکردنی بەرهەم ناوەستێت، بەڵکو تەواوکاریی بۆ هەموو جومگەکانی کەرتی وزە لە عێراقدا دروست دەکات.

وەبەرهێنانی جیهانی لە پڕۆژەی گەشەپێدان

حکومەتی عێراق دەیەوێت پڕۆژەی گەشەپێدان لە پڕۆژەیەکی ناوخۆییەوە بگۆڕێت بۆ وەبەرهێنانێکی جیهانی هەمەلایەن. ئەمەش لە ڕێگەی داڕشتنی مۆدێلێکی یاسایی ڕوون و دروستکردنی هاوبەشی لەگەڵ دامەزراوە دارایی و دڵنیاییە نێودەوڵەتییەکان بە پاڵپشتیی بودجەی ئەمریکا ئەنجام دەدرێت، هاوکات هەوڵ بۆ ڕاکێشانی کۆمپانیا بچووک و مامناوەندەکانی ئەمریکا دەدرێت بۆ ناو کەرتی وەبەرهێنان.

چاکسازی لە سیستمی بانکی و پارەدانی ئەلیکترۆنی

بەهێزکردنی سیستمەکانی پابەندبوونی بانکی تەوەرێکی دیکەی گفتوگۆکانە. شاندی عێراق کار لەسەر جێگیرکردنی سیستمی پارەدانی ئەلیکترۆنی دەکات بۆ بەدواداچوونی جووڵەی پارە و کەمکردنەوەی گەندەڵی. ئەم پرۆسەیە بە بەشداری و پاڵپشتی تەکنیکی ڕاستەوخۆی لایەنی ئەمریکی دەبێت بۆ ئەوەی سیستمە داراییەکانی عێراق لەگەڵ ستانداردی جیهانی بگونجێنرێن.

چارەنووسی سزاکان لەسەر بانک و کۆمپانیاکان

دۆسیەی ئەو سزایانەی کە ئەمریکا بەسەر بەشێک لە بانکەکان، کەسایەتییەکان و کۆمپانیا تایبەتەکانی وەک (فلای بەغداد)دا سەپاندوویەتی، یەکێکی دیکەیە لە تەوەرە هەستیارەکان. شاندی عێراق لەگەڵ بەرپرسانی واشنتن تاوتوێی میکانیزمەکانی چارەسەرکردن و لابردنی ئەو سزایانە دەکات.

گەشەپێدانی مرۆیی و هاوبەشییە نیشتمانییەکان

بەشێکی دیکەی سەردانەکە تایبەتە بە دامەزراندنی بەرنامەیەکی نیشتمانی بە هاوکاری دامەزراوەکانی ئەمریکا. ئامانجی ئەم بەرنامەیە سوودوەرگرتنە لە شارەزایی و هاوکارییەکانی ئەمریکا لە بوارەکانی گەشەپێدانی کۆمەڵایەتی و مرۆیی، لەگەڵ کردنەوەی ڕێڕەوێکی نوێی هاوکاری لەگەڵ کۆمپانیا ئەمریکییەکان لە بوارە جیاوازەکاندا.