عەلی زەیدی لە یەکەم گەشتی فەرمیدا بۆ واشنتن، پەیامێکی لە یاداشتنامەی کۆشکی سپی بۆ دۆناڵد ترەمپ جێهێشت و تێیدا ئاسۆیەکی نوێی بۆ پەیوەندییە ئابوورییەکانی نێوان بەغداد و واشنتن کێشا.

یەکەم گەشتی فەرمی بۆ کۆشکی سپی

ڕۆژی سێشەممە، عەلی زەیدی، سەرۆکوەزیرانی عێراق لە چوارچێوەی یەکەم گەشتی فەرمیدا بۆ دەرەوەی وڵات دوای دەستبەکاربوونی کابینە نوێیەکەی، گەیشتە واشنتن و لە کۆشکی سپی لەگەڵ دۆناڵد ترەمپ، سەرۆکی ئەمریکا کۆبووەوە. ئەم دیدارە وەک سەرەتایەکی نوێ بۆ پەیوەندییەکانی نێوان هەردوو وڵات لە قۆناغی دوای جەنگ سەیر دەکرێت.

یاداشتنامەی میوانە باڵاکان

نووسینگەی ڕاگەیاندنی سەرۆکوەزیرانی عێراق دیمەنە تایبەتەکانی سەردانەکەی زەیدی بۆ کۆشکی سپی بڵاوکردەوە. لە بەشێکی ڤیدیۆکەدا، عەلی زەیدی دەردەکەوێت کە لە دەفتەری یاداشتنامە و یادەوەریی میوانە باڵاکانی کۆشکی سپیدا پەیامێکی نووسیوە. زەیدی لەو یاداشتەدا ئامانجی سەرەکیی سەردانەکەی بۆ ئەمریکا ڕوون کردووەتەوە.

هاوبەشیی ئابووری و پیرۆزبایی سەربەخۆیی

سەرۆکوەزیرانی عێراق لە نووسینەکەیدا جەختی لەوە کردووەتەوە کە سەردانەکەی ڕاگەیاندنی فەرمیی هاوبەشییەکی ئابوورییە لە نێوان بەغداد و واشنتن، بە جۆرێک کە خزمەت بە بەرژەوەندییەکانی گەلی عێراق و گەلی ئەمریکا بکات. هاوکات، زەیدی بە بۆنەی تێپەڕبوونی 250 ساڵ بەسەر سەربەخۆیی ئەمریکادا، پیرۆزبایی ئاڕاستەی گەلی ئەو وڵاتە کردووە.

دەقی نووسینەکەی زەیدی لە یاداشتنامەی کۆشکی سپی:

"بە ناوی خوای بەخشندەی میهرەبان و پشت بەو دەبەستین. ئەمڕۆ شەڕەفمەند بووم بە سەردانیکردنی کۆشکی سپی، ئەویش لەسەر بانگهێشتی فەخامەتی سەرۆک دۆناڵد ترەمپی بەڕێز. ئەم سەردانە ڕاگەیاندنی هاوبەشیی ئابوورییە لە نێوان هەردوو وڵاتدا بە جۆرێک خزمەتی هەردوو گەلی مەزنمان بکات. هەروەها پێم خۆشە بە بۆنەی تێپەڕبوونی 250 ساڵ بەسەر سەربەخۆییاندا، پیرۆزبایی لە گەلی ئەمریکا بکەم."