باسم محەممەد خزەیر وەزیری نەوتی عێراق ڕایگەیاند، وڵاتەکەى پلانى هەیە گرێبەست لەگەڵ کۆمپانیا جیهانییەکان بکات بۆ ڕاکێشانى هێڵێکى بۆرى بۆ گواستنەوەى نەوت لە بەسرەوە بۆ پێشخاپوور.

کێشەی ئابووری و دارایی بەربەست بووە

وەزیری نەوت لە لێدوانێکى رۆژنامەوانیدا ڕایگەیاند، کێشەی ئابووری و دارایی بەربەست بووە لە ڕاکێشانى بۆری نوێ، بەڵام ئێستا هاوپەیمانییەک هەیە لەنێوان دوو کۆمپانیای ئەمریکی ئەوانیش کۆمپانیاکانى "تی ئای کاپیتاڵ و شیڤرۆن" و کۆمپانیای یو سی سی قەتەڕی، هەروەها کۆمپانیایەکی عێراقی دەچێتە هاوپەیمانییەکەوە و لە ڕاکێشانى بۆرییەکە بەشدار دەبێت.

لە بەسرەوە بۆ پیشخاپوور و لەوێشەوە بۆ بەندەری جەیهان

ئاماژەى بەوەشکرد، بۆرییە نەوتییەکە لە بەسرەوە بۆ پێشخاپوور و لەوێشەوە بە بەندەرى جەیهان و لقێکیش دەچێتە حەدیسە و بە بەندەرى بانیاسەوە دەبەسترێتەوە.

بوونی لێکتێگەیشتنی هاوبەش لە نێوان ترەمپ و زەیدی

وەزیری نەوت گوتیشی "لێکتێگەیشتنێکی هاوبەش لەنێوان دۆناڵد ترەمپ و عەلی زەیدی هەیە بۆ ڕاکێشانی کۆمپانیا جیهانییەکان بۆ عێراق".

بەگوتەى باسم محەممەد خوزەیر، لە پێش جەنگدا عێراق ستراتیجی هەمەجۆرکردنی دەروازەکانی هەناردەکردنی نەوت هەبووە، جەختیکردەوە "ناکرێت عێراق کە یەدەگێکی زۆری نەوت و گازی هەیە، تەنیا لە یەک دەروازەوە هەناردەى بکات کە ئەویش گەرووى هوورمزە".