عەلی فالح زەیدی، سەرۆکوەزیرانی عێراق، لە ناو جەرگەی ململانێکانی ئەمریکا و ئێراندا سوورە لەسەر جێبەجێکردنی کارنامە سەربەخۆکەی و ڕێگریکردن لە تێکدانی سەقامگیریی وڵات لە ڕێگەی هێرشە درۆنییەکانەوە.

ڕەتکردنەوەی فشارەکانی تاران بۆ سەردانی واشنتن

بەگوێرەی ڕاپۆرتێکی ماڵپەڕی "Axios"، عەلی فالح زەیدی فشارەکانی ئێرانی بۆ پاشگەزبوونەوە لە سەردانەکەی بۆ واشنتن ڕەتکردووەتەوە. زەیدی سوور بووە لەسەر ئەنجامدانی دیدارەکەی لەگەڵ دۆناڵد ترەمپ لە کۆشکی سپی، ئەمەش سەرەڕای ئەوەی چەند ڕۆژێک لەمەوبەر بۆ بەشداری لە ڕێوڕەسمی بەخاکسپاردنی ڕێبەری باڵای ئێران لە تاران بووە. ئەم هەنگاوە وەک هەوڵێکی بەغداد دەبینرێت بۆ پاراستنی هاوسەنگیی پەیوەندییەکانی لەگەڵ واشنتن و تاران لە سایەی پەرەسەندنی گرژییە سەربازییەکانی ناوچەکەدا.

هەڵوێستی تووند بەرامبەر هێرشە درۆنییەکەی هەولێر

هاوکات لەگەڵ سەردانەکەی بۆ ئەمریکا، سەرۆکوەزیرانی عێراق ئیدانەی ئەو هێرشە درۆنییەی کرد کە کرایە سەر ئاسمانی شاری هەولێر. زەیدی ئەم کارەی بە "دەستدرێژی بۆ سەر ئاسایش و سەقامگیری وڵات" وەسف کرد و ڕایگەیاند کە حکومەت چاوپۆشی لە هیچ هەوڵێک ناکات کە ئامانجی تێکدانی ئاشتی کۆمەڵایەتی و پڕۆسەی بونیادنانی دەوڵەت بێت. ناوبراو جەختی کردەوە "ڕێگە نادەن هیچ لایەنێک ئاسایشی گەلی عێراق بخاتە مەترسییەوە".

ڕێکاری ئەمنی و هاوئاهەنگی لەگەڵ هەرێمی کوردستان

سەرۆکوەزیرانی عێراق ڕێنمایی داوەتە دەزگا ئەمنییە فیدراڵییەکان کە بە هەماهەنگیی تەواو لەگەڵ هێزە ئەمنییەکانی هەرێمی کوردستان، هەموو ڕێکارە پێویستەکان بگرنەبەر بۆ ڕێگریکردن لە دووبارەبوونەوەی هێرشی لەو شێوەیە. ئامانجی ئەم ڕێکارانە ڕاوەدوونانی ئەو لایەنانەیە کە لە پشت هێرشەکانەوەن، تاوەکو ڕووبەڕووی یاسا بکرێنەوە و سەروەریی خاکی عێراق بپارێزرێت.

پێشهاتە مەیدانییەکان و ئاڵنگارییەکانی بەغداد

شەوى ڕابردوو، کەناڵ8 بڵاویکردووەتەوە، چەند فڕۆکەیەکی بێفڕۆکەوان لە ئاسمانی هەولێر خراونەتە خوارەوە، بەڵام تاوەکو ئێستا هیچ لایەنێک بەرپرسیارێتی خۆی لە هێرشەکە ڕانەگەیاندووە و ناوی هیچ گرووپێکیش بە فەرمی لەلایەن دەسەڵاتدارانی عێراقەوە ئاشکرا نەکراوە. ئەم دۆخە نیشاندەری ئەو ئاڵنگارییە گەورانەیە کە ڕووبەڕووی حکومەتی زەیدی دەبنەوە لە بەڕێوەبردنی پەیوەندییە دەرەکییەکان و دوورخستنەوەی وڵات لە ململانێی بەردەوامی نێوان واشنتن و تاران.