لە هەولێر و سلێمانى غاز فرۆشەکان ئاگادار دەکرێنەوە نرخ زیاد نەکەن و داوا لە کارگەکانى غازیش دەکرێت غاز تەنیا بەو بریکارانە بدرێت کە حکومین و بە نرخى پاڵپشتیکراو غاز دەفرۆشن.

نەوت و کانزاکانى هەولێر هۆشدارى دەدات

بەڕێوەبەرایەتى نەوت و کانزاکانى هەولێر لە ڕاگەیێندراوێکدا، ئاگادارى سەرجەم کارگەکانى غاز و گۆڕەپانەکانى فرۆشتنى غاز دەکاتەوە کە تەنیا غاز بدەنە ئەو بریکار و بارهەڵگرانەى کە حکومین و بەنرخى پاڵپشتیکراو غاز دەفرۆشن بە هاونیشتمانییان بەپێچەوانەوە ڕێگەپێدراونییە غازبدرێتە هیچ بارهەڵگرێکى دیکە و بازرگانى.

سلێمانى بەشى دوو مانگ غازى هەیە

هاوکات لیژنەى دابەشکردنى غاز لە قایمقامیەتى سلێمانى بڵاویانکردووەتەوە کە بەشی دوومانگ غازى کۆگاکراویان هەیە.

عومەر عەبدوڵا، سەرۆکى لیژنەکە رایگەیاندووە، بەشى دوومانگ غازى ماڵان کۆگاکراوە و هەرکەسێک نرخەکەى زیادبکات سزادەدرێت و ڕووبەڕووى لێپرسینەوەى یاسایی دەکرێتەوە.

وەستانى بەرهەمهێنانى غاز لە کۆرمۆر

پاش ڕاگەیێندراوەکەى دوێنێى وەزارەتى کارەبا بۆ ڕاگرتنى بەرهەمهێنانى غاز لە کێڵگەى کۆرمۆر، بەشێک لە هاونیشتمانییان لە ترسى سەرهەڵدانى قەیرانى غاز ڕوویان لە بەنزینخانەکان کرد بۆئەوەى بوتڵە بەتاڵەکانیان پڕبکەنەوە.