سەرۆکى لیژنەى دابەشکردنى غاز لە سلێمانى ڕایگەیاند، غازى پێویست کۆگاکراوە، بەهۆى ئەوەى وەرزى هاوینە خواست لەسەر غاز کەمیکردووە، بۆیە دڵنیایی دەدەن کەمبوونەوەى غازى ماڵان ڕوونادات.

سەردانى وێستگەکان و سزاى سەرپێچیکاران

عومەر عەبدوڵا، سەرۆکى لیژنەى دابەشکردنى غاز لە سلێمانى، دەڵێت "ئێوارەى دوێنی لەگەڵ هەواڵى کەمبوونەوەى غازى ماڵان ژمارەیەک لە وێستگەکان غازیان گرانکردووە یان دایانخستووە و بە هاونیشتمانیانیان گوتووە نایفرۆشن بۆیە زۆرینەى وێستگەکانیان بەسەرکردووەتەوە هەر وێستگەیەک گرانفرۆشى کردبێت یاخود غازى هەبێت و دابەشى نەکردبێت سزایان داوە.

هۆشدارى بە غازفرۆشان دراوە

ئەوە لە کاتێکدایە، ئەمڕۆ هەینى، لە هەولێر و سلێمانى غاز فرۆشەکان ئاگادار کرانەوە نرخ زیاد نەکەن و داوا لە کارگەکانى غازیش کرا غاز تەنیا بەو بریکارانە بدرێت کە حکومین و بە نرخى پاڵپشتیکراو غاز دەفرۆشن.

داواى لە حکومەتى فیدڕاڵى کراوە بۆ دابینکردنى غازى شل

هەر ئەمڕۆ هەینى، وەزارەتى سامانە سرووشتییەکان و وەزارەتی کارەبا ڕایانگەیاند، تیمێکی تایبەت ڕاسپێردراوە بۆ دۆخی کارەبا و ڕەزامەندیی حکومەتی فیدراڵ وەرگیراوە بۆ دابینکردنی غازی شل بۆ ماڵان و قەیرانی غاز دروست نابێت.