گرژییە سەربازییەکانی گەرووی هورمز گەیشتوونەتە لوتکە و تەقینەوەی نەوتهەڵگرەکان وایکردووە هاتوچۆی کەشتیوانی لەو ڕێڕەوە ستراتیژییەدا بە ڕێژەی 90% پاشەکشە بکات.

تەقینەوەی نەوتهەڵگرەکان لە کێڵگەی میندا

سوپای پاسدارانی ئێران ڕایگەیاند، 2 نەوتهەڵگر لە کاتی تێپەڕبوونیان لە ڕێڕەوێکی باشووری گەرووی هورمز تەقینەتەوە و ئاگریان گرتووە. تاران بانگەشەی ئەوە دەکات کە ئەم 2 کەشتییە بەهۆی "فێڵ و چەواشەکاریی" دەزگا هەواڵگرییەکانی ئەمریکاوە پەلکێشی ناو کێڵگەیەکی مین کراون. تاوەکو ئێستا ناسنامەی کەشتییەکان و زیانە گیانییەکانی ناو ستافەکانیان ئاشکرا نەکراوە.

ڕاگرتنی 4 کەشتیی دیکە لەلایەن ئێرانەوە

هاوکات لەگەڵ ئەم ڕووداوە، تەلەفزیۆنی فەرمیی ئێران بڵاویکردەوە کە هێزە دەریاییەکانی سوپای پاسداران 4 کەشتیی دیکەیان لە کاتی تێپەڕبوونیان لە گەرووەکەدا ڕاگرتووە. بەرپرسانی ئێران هیچ زانیارییەکیان لەبارەی ناسنامەی کەشتییەکان یان هۆکاری یاسایی و ئەمنیی ڕاگرتنیان بۆ میدیاکان نەخستووەتە ڕوو، ئەمەش ترسی زیاتری لە ناو کۆمپانیاکانی کەشتیوانیدا دروست کردووە.

پاشەکشەی بێپێشینەی جووڵەی بازرگانی

بەهۆی پەرەسەندنی ململانێ سەربازییەکانی نێوان واشنتن و تاران، جووڵەی کەشتیوانی لە گەرووی هورمز تووشی پەککەوتنێکی گەورە بووە. بەپێی داتاکانی کۆمپانیای (Kpler) کە تایبەتە بە چاودێریی بارە دەریاییەکان، ڕۆژی پێنجشەممە تەنیا 8 کەشتی لە گەرووەکە تێپەڕیون. ئەمە لە کاتێکدایە کە ڕۆژی چوارشەممە 15 کەشتی و 2 هەفتە لەمەوبەر ڕۆژانە 48 کەشتی لەو ناوچەیەدا هاتوچۆیان دەکرد.

لە 100 کەشتییەوە بۆ 8 کەشتی

کاریگەرییەکانی جەنگ لەسەر ئاسایشی وزەی جیهانی بە ڕوونی دیارن. پێش هەڵگیرسانی جەنگ لە کۆتایی مانگی شوباتدا، تێکڕای هاتوچۆی ڕۆژانە لە گەرووی هورمز دەگەیشتە زیاتر لە 100 کەشتی. دابەزینی ئەم ئامارە بۆ تەنیا 8 کەشتی لە ڕۆژێکدا، نیشانەی ئەوەیە کە گەرووەکە بە کردەیی بووەتە ناوچەیەکی جەنگی و مەترسییەکی گەورە لەسەر بازرگانیی نێودەوڵەتی دروست بووە.