د. هەردی تاریق: ڤایرۆسی ملەخڕێ لە هەرزەکاراندا دەبێتەهۆی بچووکبوونەوە و پوکانەوەی گونەکان
د. هەردی تاریق زەنگەنە، پزیشکی پسپۆڕی نەشتەرگەریی گورچیلە و میزەڕۆ، پەیوەندیی نێوان ملەخڕی و تووشبوون بە نەزۆکی بۆ پیاوان دەخاتەڕوو.
ملەخڕێ چییە؟
پزیشکە پسپۆڕەکە دەڵێت '' ملەخڕێ نەخۆشییەکی گواستراوەی ڤایرۆسیە و لە کۆتایی وەزری زستان و سەرەتای وەرزی بەهار زیاتر دەردەکەوێت، ملەخڕێ دەبێتەهۆی هەوکردن و هەڵاوسانی لیکە ڕژێنەکان بەتایبەت لیکە ڕژێنی نێوان گوێ و شەویلگە''.
نیشانەکانی ملەخڕێ چین؟
د. هەردی تاریق دەڵێت ''ملەخڕە چەند نیشانەیەکی هەیە''، لەوانە:
- ئاوسانی لیکە ڕژێنەکان
- ئازاری سەر و ڕشانەوە
- لەشداهێزران
- ئازاری ماسولکەکان
- بەرزبونەوەی پلەی گەرمیی جەستە
پەیوەندیی نێوان ملەخڕێ و تووشبوون بە نەزۆکی
پزیشکەکە دەڵێت '' کاتێک هەرزەکاران تووشی ملەخڕە دەبن، لەسێیەکی چارەخوازەکاندا ڤایرۆسەکە دەگوێزرێتەوە بۆ گونیان و توشی ئاوسان و ئازاری گون دەبن. تەنیا لە 10%ـی هەردوو گونەکان تووشی ڤایرۆسی ملەخڕە دەبن، زۆربەی کات تەنیا یەک گوون تووشی ڤایرۆسەکە دەبێت. دوای یەک هەفته لە تووشبوون بە ملەخڕێ، گونی چارەخوازەکە تووشی ڤایرۆسی ملەخڕێ دەبێت و دەبێتههۆی ئاوسان، سووربوونەوە، ئازاری گون، تا و ڕشانەوە. کاتێک ڤایرۆسی ملەخڕێ تووشی گونەکان دەبێت لە هەرزەکاراندا دەبێتەهۆی بچووکبوونەوە و پوکانەوەی گونەکان، ئەگەر هەردوو گونەکان تووش ببێت دەبێتەهۆی نەزۆکی و کەمبوونەوەی ئاستی هۆڕمۆنی نێرینە لە چارەخوازەکەدا، لە ساڵی 2003 ـەوە پێکوتەی دژی ڤایرۆسی ملەخڕێ چووەتە ناو پڕۆگرامی پێکوتەی عێراقی و ڕێگری لە تووشبوون بە ئەم ڤایرۆسە دەکات''.
9 کاتژمێر پێش ئێستا