لە پێشهاتێکی چاوەڕواننەکراودا، کۆمپانیای نێتفلیکس، پێشنیازێکی گەورەی پێشکەشی بەڕێوەبەرانی پێگەی Letterboxd کردووە، بەمەبەستی کڕینەوەی پێگەکەیان.

دەیانەوێت لە بینەرەکانیان نزیکببنەوە

بەگوێرەی زانیارییەکان، کۆمپانیای نێتفلیکس مکوڕە لە کڕینەوەی پێگە و سایتی Letterboxd، ئەوان دەیانەوێت لەڕێگەی ئەم پێگە کۆمەڵایەتییەوە، زیاتر لە بینەرەکانیان نزیکببنەوە.

نێتفلیکس ڕکابەری هەیە

ئەوەش ئاشکرا کراوە، هەریەک لە کۆمپانیاکانی سۆنی و پاراماونت، لەسەر هێڵن بۆ نزیکبوونەوە لە لێتەربۆکسد و دەیانەوێت ڕکابەریی نێتفلیکس بکەن لە هەوڵی کڕینەوەی ئەم پێگە کۆمەڵایەتییە سینەماییەدا.

پێگەی Letterboxd چییە؟

پێگەی Letterboxd، کە بەشێوەی سایت و بەرنامەی مۆبایل بەردەستە، یەکێکە لە گەورەترین پێگە ئەلیکترۆنییەکان بۆ تۆمارکردن و هاوبەشیپێکردنی سەرنج و گفتوگۆکان لەبارەی فیلمە تەلەڤیزیۆنی و سینەماییەکان و بەنزیکەی 30 ملیۆن بەکارهێنەری هەیە.