هێرشە مووشەکی و درۆنییەکانی ئێران بۆ سەر هەرێمی کوردستان کاردانەوەی نێوخۆیی و نێودەوڵەتیی لێکەوتووەتەوە؛ سەرکردە عێراقی و کوردستانییەکان پێکەوە پەلامارەکان بە پێشێلکاریی زەقی سەروەریی نیشتمانی و هەڕەشە بۆ سەر ئاسایشی ناوچەکە دادەنێن و داوای ڕاگرتنی دەستبەجێی ئەو کردەوە شەڕانگێزییانە دەکەن.

شەپۆلی کاردانەوە نێوخۆیی و نێودەوڵەتییەکان

هێرشە مووشەکی و درۆنییەکانی سەر هەرێمی کوردستان، کاردانەوەی فراوانی لێکەوتووەتەوە و داوا لە ئێران دەکرێت، هێرشەکان ڕابگرێت و کۆتایی بە پێشێلکردنی سەروەریی عێراق و هەرێمی کوردستان بهێنێت.

پەیامی بافڵ جەلال تاڵەبانی لەسەر هێرشەکان

بافڵ جەلال تاڵەبانی، سەرۆکی یەکێتیی نیشتمانیی کوردستان، لەبارەی هێرشە مووشەکییەکەی ڕۆژی هەینیی ئێران بۆ سەر هەرێمی کوردستان ڕایگەیاند، ئەم کردەوە شەڕانگێزییە بەئەنقەستە، پێشێلکارییەکی توندی یاسا نێودەوڵەتییەکان و ئاڵۆزکردنێکی بێ پاساوە. بە توندترین شێوە سەرکۆنەی ئەو هێرشە دەکەن. با ئەوە ڕوون بێت: بەئامانجگرتنی نەتەوەکەیان بە تەواوی قبوڵنەکراوە، سەلامەتیی گەلەکەیان هێڵێکی سوورە کە ناتوانرێت پێشێل بکرێت.

هاوپشتیی نێوان هەولێر و سلێمانی لە کاتە سەختەکاندا

بافڵ جەلال تاڵەبانی، سەرۆکی یەکێتیی نیشتمانیی کوردستان لەبارەی هاوپشتیی نێوان هێزە نیشتمانییەکانەوە گوتی، لەم کاتە سەختەدا شانبەشانی براکانیان لە هەولێر دەوەستین و هێرشکردنە سەر هەر یەکێکمان هێرشە بۆ سەر هەموومان.

هەوڵە دیپلۆماسی و بەرگرییەکانی یەکێتی لەگەڵ هاوپەیمانان

سەرۆکی یەکێتی لەبارەی هەماهەنگییە دەرەکییەکان بۆ وەڵامدانەوەی هێرشەکان ڕایگەیاند، بەشێوەیەکی چالاکانە لەگەڵ هاوپەیمان و هاوبەشەکانمان لە هەماهەنگیدان بۆ دەستەبەرکردنی وەڵامێکی دیپلۆماسی و بەرگریکردنیێکی ژیرانە، یەکلاکەرەوە و بەهێز بۆ پاراستنی نەتەوەکەیان.

ڕەتکردنەوەی پاکتاوکردنی حساباتی هەرێمی لەسەر خاکی عێراق

نزار ئامێدی، سەرۆککۆماری عێراق، لە پەیامێکدا لە تۆڕی ئێکس، سەرکۆنەی هێرشەکانی بۆ سەر هەولێر و سلێمانی کرد و دووپاتیکردەوە هەر بە ئامانجگرتنێکی خاکی عێراق لە ژێر هەر پاساوێکدا بێت پێشێلکاریی سەروەریی عێراقە و ڕەتیدەکەنەوە، هەڕەشەیە لەسەر ئاسایش و سەقامگیرییەکەی، جەختیشیکردەوە عێراق ڕەتیدەکاتەوە ببێتە گۆڕەپانی ململانێ و پاکتاوی حساباتی هەرێمی.

ڕێنماییەکانی سەرۆکوەزیرانی عێراق بۆ هێزە ئەمنییەکان

عەلی زەیدی سەرۆکوەزیرانیش، سەرکۆنەی هێرشە درۆنییەکانی سەر هەولێری کرد و دووپاتیکردەوە کەمتەرخەمی ناکەن لەبەرامبەر ئەو هەوڵە خراپانەی دەیانەوێت سەقامگیری و پرۆسەی بونیادی دەوڵەت و ئاشتەوایی کۆمەڵایەتی لەبارببەن، داواشی لە هێزە ئەمنییەکان کرد هەماهەنگی لەگەڵ هێزەکانی هەرێمی کوردستان بکەن بۆ ڕێگریکردن لە دووبارە بوونەوەی هێرشەکانی.

هۆشداریی سەرۆکی هەرێم لە پەرەسەندنی توندوتیژییەکان

نێچیرڤان بارزانی، سەرۆکی هەرێمی کوردستان ڕایگەیاند بەتوندى سەرکۆنەی هێرشەکانی سەر هەرێمی کوردستان دەکەن، بە ئامانجگرتنی هەرێمی کوردستان و دەستپێکردنەوەی توندوتیژی پەرەسەندنێکی مەترسیدار و پێشێلکارییەکی زەقی سەروەریی عێراقە.

داواکاریی حکومەتی هەرێم لە بەغدا و کۆمەڵگەی نێودەوڵەتی

سەرۆکایەتیی ئەنجوومەنی وەزیرانی کاربەڕێکەر لەبارەی دەرهاوێشتە نەرێنییەکانی بۆردومانەکانی ئێرانەوە ڕایگەیاند، لە ڕاگەیێنراوێکدا کە بڵاویکردووەتەوە ئاماژەی بەوە کردووە کە هێرشە بێپاساوەکانی ئێران، سەقامگیریی تەواوی ناوچەکە تێکدەدات و داوا لە کۆماری ئیسلامیی ئێران دەکات، کۆتایی بەم هێرشانە بهێنێت. سەرۆکایەتیی ئەنجوومەنی وەزیران داوا لە حکومەتی فیدراڵ و کۆمەڵگەی نێودەوڵەتی دەکات، سنوورێک بۆ ئەم پێشێلکارییانە دابنێن.

ڕەخنەکانی خەمیس خەنجەر لە هێرشەکان

خەمیس خەنجەر، سەرۆکی هاوپەیمانیی سیادە- لە پێگەی خۆی لە تۆڕی فەیسبووک نووسیویەتی، ئێران نیازپاکی وڵاتانی عەرەبی و هەڵوێستی ڕەتکردنەوەی جەنگ و هەوڵە نێوەندگیرییەکانیان بۆ ئاشتی بە زیادکردنی دوژمنکاری و پەرەسەندن و هەڕەشە بۆ سەر کوەیت و بەحرەین و قەتەڕ و هەرێمی کوردستان وەڵامدەداتەوە. خەمیس خەنجەر، سەرۆکی هاوپەیمانیی سیادە لەبارەی پێویستیی هەڵوێستی هاوبەشی عەرەبی و جیهانییەوە ڕایگەیاند، ئاسایشی هەرێمی کوردستان و وڵاتانی عەرەبی جیاناکرێتەوە لە ئاسایشی تەواوی ناوچەکە، بە ئامانجگرتنی پێویستی بە هەڵوێستێکی عەرەبی و نێودەوڵەتیی یەکگرتوو و توند هەیە بۆ دانانی سنوورێک بۆ ئەو پێشێلکارییانە.

هەڵوێستی ئەیاد عەلاوی لەسەر پاراستنی گیانی هاووڵاتییان

ئەیاد عەلاوی سەرۆکوەزیرانی پێشووتری عێراق لە هەژماری خۆی لە ئێکس نووسیویەتی، دەستدرێژییە بەردەوامەکان بۆ کردنە ئامانجی هەرێمی کوردستان ڕەتدەکەنەوە و سەرکۆنەی دەکەن، کردەوەی لەو جۆرە پێشێلکردنی مەترسیداری سەروەریی عێراق و هەڕەشەیە لە ئاسایشی هاوڵاتییان و سەقامگیریی وڵات.

هۆشداریی کۆمکاری عەرەبی لە فراوانبوونی بازنەی ململانێکان

نەبیل فەهمی، ئەمینداری کۆمکاری عەرەبی لەبارەی ئامانجە ناوچەیییەکانی هێرشەکانی ئێرانەوە ڕایگەیاند، لە ڕاگەیێنراوێکدا ئاماژەی بەوە کردووە کە هێرشەکانی ئێران بۆ سەر وڵاتانی کەنداو و هەرێمی کوردستان، هەوڵێکی ئاشکرایە بۆ فراوانکردنی ڕووبەری ململانێکان و بردنی ناوچەکەیە بەرەو پشێوی و تێکدانی ئاسایش و سەقامگیری.

ڕەتکردنەوەی گشتگیر بۆ بەئامانجگرتنی ژێرخانی ئابووری

نەبیل فەهمی، ئەمینداری کۆمکاری عەرەبی لەبارەی هەڵکشانی پەلامارە دوژمنکارییەکانی تارانەوە ڕایگەیاند، هەڵکشانی هێرشە ئاشکرا و دوژمنکارییەکانی ئێران بۆ سەر (بەحرەین، ئوردن، قەتەڕ، کوەیت و هەرێمی کوردستان) و کردنە ئامانجی ژێرخانی ئابووری، سەرجەمیان ڕەngدانەوەی سیاسەتێکی دوژمنکارانەیە، ناکرێت لێی بێدەنگ بن و قبوڵی بکەن.